Шеробод туманининг шимоли-ғарбий ҳудудида жойлашган «Сурхон» давлат қўриқхонасида ёнғин содир бўлгани тўғрисида хабар берилганди. Мудофаа вазирлиги ахборот ва оммавий коммуникациялар департаментининг маълум қилишича, ёнғинни ўчиришга 2 та вертолёт жалб этилган.
Маълумотларга кўра, 2020 йилнинг 17 июнь куни соат эрталаб 06:30 да Мудофаа вазирлигига қарашли Сурхондарё вилоятининг Шеробод туманида жойлашган ҳарбий қисм навбатчисига «Сурхон давлат қўриқхонаси»да ёнғин рўй бераётгани ҳақида ҳудуддаги Давлат хавфсизлик хизмати Чегара қўшинлари ҳарбий қисм қўриқлаш бригадаси навбатчисидан хабар келиб тушган.
Навбатчи ушбу хабарни белгиланган тартибда тезда ҳарбий қисм командири подполковник Фарҳод Давлатовга, у эса зудлик билан бу ҳақда юқори қўмондонликка маълум қилган.
Шундан сўнг ёнғин юз бераётган ҳудудга ҳарбий округ қўшинлари қўмондони ўринбосари полковник Қодир Турсунов ва ҳарбий қисм командири подполковник Фарҳод Давлатов етиб боришган.
Вазиятга аниқлик киритилгач, масъул офицерларнинг қарори билан ҳарбий қисмдан 200 нафарга яқин ҳарбий хизматчи бирламчи ёнғин ўчириш воситалари ва анжомлари билан офатни бартараф этишга жалб қилинган.
Шамол таъсирида ёнғин қамрови тобора кенгайиб бораётгани сабаб ҳарбийлар вертолёт авиациясини ёрдамга жалб этишга қарор қилади ва бу ҳақда Сурхондарё вилояти ҳокими – ҳарбий-маъмурий сектор раҳбарига таклиф билдирилади. Ҳоким ушбу қарорни маъқуллагач, Қарши шаҳри Хонобод қўрғонидаги Мудофаа вазирлиги Ҳаво ҳужумидан мудофаа қўшинлари ва Ҳарбий ҳаво кучларига қарашли ҳарбий қисм билан боғланиб, ўт ўчиришга 2 та Ми-8 вертолётлари жалб қилинган.
Ҳарбий қисм шахсий таркиби вертолёт авиацияси билан ҳамкорликда амалга оширган чора-тадбирлари натижасида соат 15:00 да қарийб 35 гектар ерни қамраган олов тўлиқ қуршаб олинган ва ёнғиннинг кенгайиб кетиши тўхтатилган.
«Соат 19:00 да офат ҳудудининг 90 фоиз (31,5 гектар) қисмида ёнғин тўлиқ ўчирилишига эришилди. Ёнғинни ўчириш давомида 2 та вертолёт умумий 8 соат 20 дақиқа давомида парвоз амалга ошириб, ҳар бири 10 мартадан сув сепди. Ҳарбий хизматчилар офатни бартараф этиб, қўриқхонанинг ноёб табиати куйиб кетишининг, ҳудуддаги Вандоб аҳоли яшаш пункти ёнғинда қолиш хавфининг олдини олишди», — дейилади хабарда.
Ҳудуддаги вазиятни тунда ҳам кузатиб туриш, хавф қайталамаслиги учун ҳарбий хизматчилардан навбатчи-кузатувчилар тайинланган.
Айни пайтда ёнғин келиб чиқиш сабабларини аниқлаш мақсадида Сурхондарё вилоят Ички ишлар бошқармаси томонидан суриштирув ишлари олиб борилмоқда.
Изоҳ (0)