Тошкент вилояти Бекобод туманидан оқиб ўтувчи Хосёз каналида оқиб кетаётган бола ФВБ ходими томонидан қутқарилди. Бу ҳақда ФВВ матбуот хизмати хабар берди.
Маълумотларга кўра, 18 июнь куни соат 11:10 ларда «Ўзбекистон» маҳалла фуқаролар йиғини ҳудудидан оқиб ўтувчи Хосёз каналининг қирғоқбўйи ҳудудида профилактика ишларини олиб бораётган Бекобод шаҳар ФВБга қарашли ёнғин-қутқарув қисм қутқарувчиси сержант Жасур Умурзоқов каналда оқиб кетаётган болани кўриб қолган ва ўзини сувга ташлаган.
Таъкидланишича, сержант болани сувдан олиб чиқиб, унга биринчи тиббий ёрдам кўрсатган ва болакайни ота-онасига топширган. Воқеа жойига чақиртирилган тез-тиббий ёрдам хизмати болани шифохонага олиб кетган.
Хабарда болакайнинг ёши ва у нима сабабдан сувга тушиб кетгани тўғрисида маълумот берилмаган. Бироқ ҳозирда унинг соғлиғи яхши эканлиги қайд этилган.
Аввалроқ Нукусда ИИБ ходими мастлиги сабабли сувда чўкаётган эркакни қутқариб қолгани тўғрисида хабар берилганди.
Сўнгги маълумотларга кўра, Ўзбекистонда охирги икки ойда 20 нафар вояга етмаган бола сувда чўкиб ҳалок бўлган.
Изоҳ (0)