Тошкент шаҳрининг Мирзо Улуғбек тумани ҳудудидаги Дўрмон йўли кўчасидаги иккита кўча билан кесишма оралиғидаги йўл вақтинча ёпилади. Бу ҳақда «Тошиссиққуввати» корхонаси ахборотига таяниб, Тошкент шаҳар ҳокимлиги хабар қилган.
«2020—2021 йиллар куз-қиш мавсумига тайёргарлик кўриш ишлари дастури доирасида 19 июндан 5 июлга қадар Мирзо Улуғбек тумани Дўрмон йўлидан ўтган магистрал иссиқлик қувурини капитал таъмирлаш ишлари амалга оширилади», — дейилади хабарда.
Шу муносабат билан Дўрмон йўли кўчасининг Зиёлилар ва Мирзо Улуғбек кўчалари кесишмаси оралиғидаги йўлнинг бир томонлама қатнов қисми автомобиллар ҳаракати учун вақтинча ёпилади».
Ҳокимлик матбуот хизмати ҳайдовчилардан юзага келиши мумкин бўлган тирбандликларни олдини олиш мақсадида айланма йўллардан фойдаланишни сўраган.
Аввал 2020 йилнинг 10 июнь куни соат 21:00 дан 12 июнга қадар Олмазор тумани Шимолий Олмазор кўчасининг кичик ҳалқа йўли билан кесишмасидан Жомий майдонидаги айланма йўлгача, Жомий майдонидаги айланма йўлдан Уста Ширин кўчасининг Широқ кўчаси билан кесишмасигача бўлган йўлда таъмирлаш ишлари олиб борилган ва мазкур оралиқ масофа автомобиллар ҳаракати учун вақтинча ёпилган. Шунингдек, Яшнободдан кичик ҳалқа йўлига ўтувчи қўшимча йўлнинг бир қисми вақтинча ёпилганди. 8 июнда Тошкент шаҳридаги кичик ҳалқа йўли кўчасида ва ушбу кўча билан бошқа кесишмаларда йўлни таъмирлаш ишлари амалга оширилиши, Фарғона йўли ва кичик ҳалқа йўли кўчалари кесишмасидан Фарғона йўли кўчасининг 8 март кўчаси билан кесишмасигача бўлган автомобиль йўлининг бир томони ҳамда Фарғона йўли кўчасининг Мухтор Ашрафий кўчаси билан кесишмасидан Жарқўрғон кўчаси кесишмасига бўлган оралиқдаги кўприкнинг бир томонлама ҳаракатланиш қисми ёпилиши хабар қилинган эди.
Изоҳ (0)