Жанна Фрискесиз 5 йил. Таниқли хонанданинг муваффақиятли ҳамда фожиали ҳаёт йўли — суратларда

Беш йил аввал таниқли россиялик хонанда ва актриса Жанна Фриске вафот этган эди. «РИА Новости» Фрискенинг шон-шуҳратли, шу билан бирга фожиали ҳаёти акс этган суратлар жамланмасини тақдим этди.

Жанна Фриске оғир касаллик билан бир йил курашди. У ҳаётининг сўнгги уч ойини комада ўтказди. 2015 йилнинг 15 июнь куни хонанда вафот этди.

Жаннага машҳурлик ҳамда халқ меҳри у «Блестяшие» гуруҳида фаолият юрита бошлаган 1990 йиллар ўрталарида келди.

Фриске Ольга Орлова ва Ирина Лукьянова билан гуруҳнинг «олтин таркиби»га кирган.

2003 йилда Жанна «Сўнгги қаҳрамон» реалити-шоусида иштирок этган. Хонанданинг айтишича, кўрсатув уни ўзгартирган.

Москвага қайтгач, хонанда яккахон тарзда ижодини давом эттиришини маълум қилди. Жаннанинг «Қачондир ёзда», «Ла-ла-ла», «Қоронғуликка учмоқдаман» каби хитларни жамлаган биринчи альбоми 2005 йилда сотувга чиқди.

Жанна Фрискенинг номи шоу-бизнесни ёритадиган нашрларда тез-тез тилга олинадиган бўлди.

Хонандани услуб қироличаси деб аташарди. Унинг иштирокидаги фотосессиялар журналлар муқоваларини безарди.

2004 йилда хонанданинг мухлислари уни киноактриса сифатида кўришга муваффақ бўлди. У «Тунги кузатув» фильмида жодугар ролини ижро этди.

Шундан сўнг унга кинодан кўплаб таклифлар бўла бошлади. Актриса «Кундузги кузатув», «Эркаклар нима ҳақда гапиради?», «Мен кимман?», «Янги йил совчилари» каби фильмларда ҳам турли образларни гавдалантирди.

Муваффақият ва томошабин меҳри хонандани бу соҳада ҳам кутиб турган эди.

2011 йилда Жанна Фрискенинг телебошловчи Дмитрий Шепелев билан учрашиши ҳақида гап-сўзлар пайдо бўлди. Бироқ улар шунчаки дўст эканлигини таъкидларди.

Телебошловчи билан муносабатлари ҳақидаги биринчи интервьюни Жанна 2013 йилда берган. Ўша йили у ўғли Платонни дунёга келтирган.

Фриске фарзандини дунёга келтиргач, анча пайтгача омма олдида кўриниш бермаган. 2014 йилнинг январида эса у мия саратонига чалингани маълум бўлди.

Жанна Фрискенинг даволаниш жараёни бир йилча давом этди. У Нью-Йорк ва Хитойдаги онкология клиникаларида даволанди.

2014 йилнинг октябрида хонанда Москвага қайтди. Ўшанда касалликнинг хавфли босқичи ортда қолгани айтилган эди.

Жанна Фрискенинг оила аъзолари, дўст ва ҳамкасблари, миллионлаб мухлислари мўъжиза юз беришини кутди, бироқ касаллик уни ҳаётдан олиб кетди.