Қашқадарёдаги мавжуд 1144 та мактабнинг 294 таси қиш мавсумида ҳалигача «буржуйка» печда иситилади. Бу ҳақда вилоят халқ таълими бошқармаси бошлиғи Абдуғани Ҳимматов маълум қилди, дея хабар берди «Дарё» мухбири Отабек Қўлдошев.
Қайд этилишича, 16 июнь куни Қарши шаҳридаги Журналистлар уйида бошқарма бошлиғи иштирокида матбуот брифинги ташкил этилган.
«Ҳақиқатни яшириш керак эмас, вилоятимиздаги 294 та мактаб қиш мавсумида ҳалигача «буржуйка» печ орқали иситилади ва барча вилоятларда бундай ҳолат бор», — деди Абдуғани Ҳимматов.
Қашқадарё вилоят халқ таълими бошқармаси тасарруфида бугунги кунда 1162 та таълим муассасаси мавжуд бўлиб, шунинг 1144 таси умумтаълим мактаби бўлса, қолгани махсус мактаблар, мактаб-интернатлари, Баркамол авлод марказлари ҳамда меҳрибонлик уйлари ҳисобланади.
2019/2020-ўқув йилида вилоятдаги мактабларда 627 328 нафар ўқувчи таҳсил олган. Шундан 47 846 нафари 11-синф битирувчилари бўлиб, 409 нафари олтин, 313 нафари эса кумуш медал билан ўқишни тамомлаган.
Эслатиб ўтамиз, интернет сайтларида вилоятдаги мактабларнинг иситиш тизими, умумтаълим мактабларига берилаётган кўмир ва брикетларнинг сифатсизлиги борасида кўплаб танқидий мақолалар эълон қилинган.
Изоҳ (0)