Беларусь давлат назорати қўмитаси «Белгазпромбанк»нинг собиқ раҳбари ва президентлик сайловларида Александр Лукашенконинг асосий рақиби бўлиши кутилган Виктор Бабарико ҳибсга олган. Бу ҳақда «Белтелерадиокомпания» хабар берди.

Виктор Бабарико

Фото: «Del.by»

Қўмита раҳбари Иван Тертель Бабариконинг ноқонуний ташкилот тузгани ва унга раҳбарлик қилганини билдирган. Тертель гап қайси фаолият йўналиши борасида кетаётганига аниқлик киритмаган. Амалдор солиқларни тўламаслик ва пул ювиш операцияларида иштирок этган бўлиши мумкин. Аввал «Белгазпромбанк»нинг бир нечта собиқ ва ҳозир ҳам ишлаётган ходимлари қамоққа олинганди.

Тертелнинг сўзларига кўра, Беларусь давлат назорати қўмитаси «Белгазпромбанк»да хориждаги банкларга, хусусан, Латвиядаги ABVL банкига пул ювиш схемалари орқали маблағлари ўтказилганини аниқлаган. Бундан ташқари «Белгазпромбанк» ходимлари фуқароларга мажбуран кредитлари берган ва кредит тарихи ёмон тадбиркорларга ссудалар ажратиш учун улардан пора олган.

«Талон-торож, фирибгарлик, пора олиш ва пора бериш, жиноий йўл билан топилган пулларни ўзлаштириш жиноят ишлари бўйича 20 нафарга яқин одам ҳибсга олинган. Қамоққа олинганларнинг ҳаммаси айбини тан олган ва Бабариконинг жиноий гуруҳга ҳамда схемага раҳбарлик қилганлигига гувоҳлик берган», – дейилади «Белтелерадиокомпания» берган хабарда.

Виктор Бабарико ва унинг ўғли Эдуард 18 июнь куни «Белгазпромбанк» иши бўйича сўроқ қилишга олиб келинган. Уларнинг ёнига адвокатлар киритлмаяпти ва жиноят ишининг мақоми ҳақида расмий маълумот берилмаган. Бабариконинг уйида тинтув ишлари бошланган.

«Белгазпромбанк» иши бошлангани ҳақида 11 июнда маълум қилинган, Беларусь давлат назорати қўмитаси вакиллари кредит ташкилотининг бош офисига келиб тинтув ўтказганди. 15 июнда Беларусь миллий банки «Белгазпромбанк»га вақтинчалик администрацияни тайинлаган.

Аввал Қирғизистон бош вазири Муҳаммадкалий Абилгазиевнинг коррупцияга алоқадорликда гумон қилинаётгани туфайли истеъфога чиққан ва ҳукумат раҳбари лавозимига шу вақтга қадар мазкур вазифани вақтинча бажариб келган Қубатбек Бўронов тайинланганди. Абилгазиевдан аввал 2017—2018 йилларда президент Алмазбек Атамбаев раҳбарлигида бош вазир бўлган Сапар Исоқов коррупцияда айбланиб, 18 йилга озодликдан маҳрум қилинган.