Вазирлар Маҳкамасининг 16 июндаги 385-сонли қарори билан Одил Абдураҳмонов Тошкент давлат транспорт университетининг ректори этиб тайинланди. Бу ҳақда Олий ва ўрта махсус таълим вазирлиги маълум қилди.
Одил Абдураҳмонов 1978 йилда туғилган. Бунга қадар Президентнинг фан, таълим, соғлиқни сақлаш ва спорт масалалари бўйича маслаҳатчиси Абдужаббор Абдувоҳидовнинг ўринбосари сифатида ишлаган.
Шунингдек, у олий ва ўрта махсус таълим вазирининг биринчи ўринбосари, Президент администрациясида бош маслаҳатчи (консультант) бўлган, Республика бандлик, меҳнат муҳофазаси ва аҳолини ижтимоий ҳимоя қилиш илмий марказига раҳбарлик қилган ва иқтисодиёт фанлари доктори илмий даражасига эга.
Аввалроқ Президент Администрацияси таълим шўъбаси мудири Усмон Шарифхўжаев халқ таълими вазирининг биринчи ўринбосари лавозимини эгаллагани ҳақида хабар берилган эди.
Эслатиб ўтамиз, май ойида Тошкент темир йўл муҳандислари институти, Тошкент автомобиль йўлларини лойиҳалаш, қуриш ва эксплуатацияси институти ва Тошкент давлат техника университетининг авиакосмик технологиялари факультети негизида Тошкент транспорт университети ташкил этилиши тўғрисида хабар берилганди.
Изоҳ (0)