Перуда яшовчи Мария Тамбо қизлари билан коронавирус етиб бормаган она қишлоғига етиб бориш учун 560 километр масофани пиёда босиб ўтди. Оила жазирамада, тоғ йўлларидан юриб, қишлоққа етиб борган. Бу ҳақда CNN хабар берди.
40 ёшли аёл карантин жорий қилингунига қадар 17 ёшли қизи Амели кириш имтиҳонларига тайёрланиши учун пойтахт Лимага кичик қишлоқдан кўчиб келган эди. Амели оиладаги биринчи олий маълумотли аёл бўлиши кутилмоқда.
Бироқ Перуда карантин жорий қилинди ва ҳаракатланиш чекланди. Тамбо қизлари билан кичик хонани ижрага олиб, яшаётган эди. Май ойи бошида уларнинг пули тугади.
Оила мамлакатнинг нариги бурчагидаги Укаяли провинциясидаги қишлоқларига пиёда етиб олишга қарор қилди.
«Мен фарзандларим ҳаётини хавф остига қўяётганимни билардим. Бироқ менда танлаш имкони йўқ эди. Ёки Лимадаги кичик хонада очликдан ўлардик ёки таваккал қилиб йўлга чиқиш», — дейди Мария Тамбо.
Оила умумий ҳисобда 560 километр пиёда юрган. Баъзан саховатли инсонлар уларнинг узоғини яқин қилган. Бироқ йўлнинг асосий қисмини пиёда босиб ўтишган. Улар Анд тоғларининг Перудаги қисмидан ўтган. Тамбо ва қизлари бир ҳафта йўл юрган. Ҳозирда оила ўз уйида. Бироқ COVID-19 туфайли улар икки ҳафта карантинда бўлган.
Изоҳ (0)