Жанубий Корея бирлашиш вазири Ким Ён Чхоль КХДР билан муносабатлар ёмонлашгани сабабли истеъфога чиқишга қарор қилганини эълон қилди. Бу ҳақда Yonhap агентлиги хабар бермоқда.
Ким Ён Чхоль
Фото: AP Photo
«Корея ярим оролида тинчлик ва фаровонлик борасида халқимизнинг умид ва талабларига жавоб бера олмаслигимиздан афсусдаман», — деган у.
9 июнь куни Пхенян жануб билан музокараларда «умидсизлик» ва Сеул билан муносабатларнинг бузилганлигини эълон қилди. КХДРда эса Жанубий Корея ҳукумати улар ўртасидаги муносабатларни «якуний нуқтага» олиб келгани таъкидланди.
Эслатиб ўтамиз, Шимолий ва Жанубий Корея муносабатлари сўнгги икки ҳафта давомида ёмонлашиб бормоқда. Дастлаб КХДР Жанубий Кореянинг қўнғироқларига жавоб бермади. 9 июнь куни эса КХДР 2018 йилдан бери илк бор Жанубий Корея билан алоқаларни тўхтатди. КХДР Сеул билан барча алоқа линияларини Пхенянга қарши юборилган ташвиқот варақалари сабаб блоклаган. Узоқ йиллар давомида ишламаган алоқа линиялари 2018 йилда қайта тикланган, шундан буён мамлакатлар кунига икки маротаба ўзаро қўнғироқлашиб турганди.
14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларини амалга оширишга чақирди. 16 июнь куни эса Шимолий Корея ҳарбийлари Кесон шаҳрида жойлашган Кореялараро алоқа офисини портлатиб юборди.
Эндиликда КХДР Жанубий Корея билан чегарадош қуролсизлантирилган ҳудудларга ўз қўшинларини қайтармоқчи. Шу мақсадда ўз қўшинларини Кимгансан туристик зонаси ва Кэсон саноат комплексига жойлаштиришга тайёрланмоқда.
