Biz havas bilan qaraydigan, ilhomlanadigan mashhurlar hayotida ham past va balandliklar, kasalliklar bo‘lishi tabiiy hol. Cosmopolitan nashri yulduzlar chalingan jiddiy kasalliklarga to‘xtaldi.

Tom Xenks

Foto: Cosmopolitan

Aktyorga 2013-yilda qandli diabetning 2 turi tashxisi qo‘yilgan. Tomning o‘zi ushbu kasallikni yoshlikdagi xatolar ketidan orttirib olganini tan oladi. “Biz nima yeyayotganimiz haqida o‘ylamaganmiz, sog‘lig‘imizga e’tibor bermaganmiz — mana oqibati”, — deydi aktyor.

Xolli Berri

Foto: Cosmopolitan

Qandli diabet bilan kasallangan yana bir jahon yulduzi — Xolli Berri. 23 yashar vaqtida Xolli suratga olish maydonchasida to‘satdan hushini yo‘qotgan va shundan keyingina aktrisa kasalligi haqida bilgan. Shifoxonaga olib borilganida shifokorlar unga qandli diabet tashxisini qo‘ygan. Ushbu “yangilik”dan Xolli shokka tushgan, chunki uning oilasida ushbu kasallikka chalinganlar bo‘lmagan. Shunga qaramay u o‘zini qo‘lga olishga harakat qilgan va sog‘lig‘iga jiddiy e’tibor bera boshlagan. Aktrisa hammasi iziga tushishiga sport bilan shug‘ullanish sababchi bo‘lganini ta’kidlaydi.

Alek Bolduin

Foto: Cosmopolitan

Alekni ko‘p yillar davomida suyaklardagi og‘riqlar bezovta qilgan va u revmatizmdan davolangan. Keyinchalik esa unga borrelioz tashxisi qo‘yilgan.

Juliya Roberts

Foto: Cosmopolitan

Aktrisaga trombositopeniya tashxisi qo‘yilgan. Ushbu kasallikda qon yaxshi ivimagani sabab kichik tirnalishlar ham katta miqdorda qon ketishiga sababchi bo‘lishi mumkin. Juliyada birinchi marta 2002-yilda kasallik simptomlari kuzatila boshlagan. Aktrisa faoliyatini davom ettirishiga kasallik qarshilik qilolmadi va bugungi kunda u boshqalarni ham salomatlikka e’tiborli bo‘lishga chaqiradi.

Xyu Jekman

Foto: Cosmopolitan

Afsonaviy Xyu Jekman teri saratoni bilan kurashib keladi. O‘sma ultrabinafsha nurlarida rivojlangani sabab shifokorlar aktyorga terisini quyoshdan himoyalashni tavsiya qilgan. Xyu Jekman bir necha marotaba kimyoterapiya va jarrohlik amaliyotini boshidan o‘tkazgan, bugungi​ kunda esa u o‘zini yaxshi his qilishini ta’kidlaydi.

Selena Gomes

Foto: Cosmopolitan

Selenaga qizil volchanka, ya’ni teri silining bir turi tashxisi qo‘yilgan. Bir qancha a’zolar, xususan, yurak, teri va buyrak faoliyatining yomonlashuviga sababchi bo‘ladigan ushbu kasallik haqida xonanda 2013-yilda xabardor bo‘lgan. Shundan keyin uning hayotida kasallik bilan bog‘liq muammolar kuzatilgan: kuchli depressiyaga tushgan, kimyoterapiya kurslariga qatnagan hamda unga buyrak ko‘chirib o‘tkazilgan.