Андижонда фуқаро А. Абдукаримов ички ишлар ходимлари томонидан қийноққа солинганидан сўнг вафот этгани ҳақидаги хабар жамоатчилик орасида жиддий норозиликка сабаб бўлмоқда. Олий Мажлис Қонунчилик палатаси депутатлари Қодир Жўраев ва Расул Кушербаев ушбу вазият бўйича муносабат билдирди.

Фото: Telegram / «Депутатлар минбари»

Қодир Жўраевнинг сўзларига кўра, Андижонда ички ишлар органлари билан боғлиқ юз берган мудҳиш ҳолат такрорланмаслиги учун айбдорларни жавобгарликка тортишнинг ўзигина кифоя қилмайди.

«Жазолаш билан ҳеч нарсага эришиб бўлмайди. Озгина вақтдан сўнг шу каби ваҳшийлик бошқа жойда яна содир этилмаслигига кафолат йўқ. Шу боис, ички ишлар органларида тизимли ислоҳотлар, янгиланишлар амалга оширилиши зарур. Ишни ходимларни аттестациядан ўтказишдан, уларнинг сонини оптимизация қилишдан бошлаш мақсадга мувофиқ.

Ички ишлар вазирлиги раҳбарияти марҳум йигитнинг оиласидан лоақал бир оғиз кечирим сўраб қўйишса яхши бўларди», — дейди Қодир Жўраев.

Расул Кушербаев ҳам ИИВ раҳбарияти халқ олдида ҳеч бўлмаса бир марта кечирим сўрамаганини таъкидлади. «Тизимга нисбатан ижодий пародия қилган ижодкорларни ҳам кечирим сўраттириш даражасига етиб келган ‘фаришта’ тизим раҳбарияти ўз ходимлари қонунбузилишининг оғир кўринишларига йўл қўйганда ҳам ҳокисор халқ олдида ҳеч бўлмаса бир бор кечирим сўрамаса. Манманлик ва кибр ҳам шунчаликми, ахир уларга ваколат берган, кўкларга кўтариб сийлаган шу халқ эмасми? Ваҳоланки тизимни кулгига олган ижодкорлар ҳам танқид қилаётган бошқалар ҳам улар каби ‘одам ўлдириш’ даражасига боришмаяпти», — деди депутат.

Кушербаевнинг билдиришича, ҳар бир тизимдаги камчилик ёки ютуқ бевосита ушбу соҳага раҳбарлик қилаётган шахсларнинг қобилияти, халққа садоқат, инсон ҳуқуқларини ҳимоя қилиш йўлида ишни ташкил қила олишига боғлиқ.

«Афсуски жамоатчиликка маълум бўлиб қолаётган сўнгги воқеалар (аслида бундан ҳам кўп бўлиши мумкин) ички ишлар тизимига раҳбарлик қилиб келаётган шахсларнинг фаолиятига бўлган ёндашувни қайта кўриб чиқишни тақозо этмоқда. Ҳозирги вазиримизни халқпарвар, деб эшитганман. Аммо бўлиб ўтган ҳолатлар уларнинг истеъфо вақти етиб келганини кўрсатяпти.

Ҳурматли вазиримиз халқ олдида тизимнинг обрўси тушиши, одамларнинг эътирозлари, ходимларнинг босар-тусарини билмай ИИБда қийноқ, ўлдириш каби ишларни ‘табиий ҳолга айланиб’ боришида энг минимал даражада бўлсин айбдор. Ва биз бу каби ишларни уларнинг раҳбарлик даврида кўпроқ эшитяпмиз.

Ҳозир энг муҳими тизимни фуқаро билан инсон сифатида муносабат қила оладиган даражада ислоҳ қилишга тайёр, Президент ташаббуси билан инсон ҳуқуқларини таъминлаш борасида қилинаётган ишларни юқори даражага олиб чиқишга қодир кадрлар билан тўлдириш ва ортиқча юклардан халос этиш зарур.

Бизга халқ берган ваколат, Президент билдирган ишончни инсон ҳуқуқларини бузиш эмас, таъминлаш йўлида ишлатиб, халқни рози қилиш учун меҳнат қиладиган ‘тили ва иши бир’ қонун ҳимоячилари керак», — дейди депутат.

Эслатиб ўтамиз, Андижонда фуқаро А.Абдукаримов ИИБдаги қийноқдан сўнг 11 июнь куни вафот этгач, беш киши ишдан олинди, 19 киши жазоланди. Ҳолат юзасидан Андижон шаҳар прокуратураси томонидан Жиноят кодексининг тегишли моддалари билан жиноят иши қўзғатилган. Олиб борилган тергов ҳаракатлари давомида уч нафар ички ишлар органлари ходимига нисбатан Жиноят кодексининг 206, 234 ва 235-моддалари билан айб эълон қилиниб, қамоққа олиш тарзидаги эҳтиёт чораси қўлланилган.