“Qalpoq” hamda “Sho‘rdanak” hajviy ko‘rsatuvlari ijodkorlari YHXB xodimlari haqidagi hazillari uchun ichki ishlar organlari xodimlaridan kechirim so‘radi.
“Qalpoq” ko‘rsatuvida spirtli ichimlik ichib, mashina boshqargan haydovchi akasining formasini kiyib ko‘chaga chiqqan YHXB xodimiga pora bergani ko‘rsatilgan.
“‘GAI’ va militsiya xodimlari ustidan bunday hazil qilishimiz noto‘g‘ri aslida. Hech qaysi ‘GAI’ haydovchini to‘xtatib pora olmaydi. Haydovchilarning o‘zi ‘Otam kasal, enam o‘lib qoldi’, deb ularning rahmini keltirib, nimadirlar qiladi. ‘GAI’ning pul so‘rashi hayotda bo‘lmagan. Men birorta ‘GAI’ni yomon demayman”, — deydi “Qalpoq” hajviy ko‘rsatuvi aktyori Rahmonali Surobov.
“Sho‘rdanak” ko‘rsatuvi aktyorlari esa YHXB xodimlarining haydovchini sababsiz to‘xtatib, undan pul undirmoqchi bo‘lganini ko‘rsatgan. Shuningdek, ushbu ko‘rsatuvda haydovchi o‘t o‘chirish moslamasi va dori qutisi sotib olmagani uchun tez yordam va o‘t o‘chirish mashinasi bilan birga yurgani ham aks ettirilgan.
“‘GAI’ xodimlari haqida biz avval ham hazillar qilganmiz, biroq shu safar biroz xato-kamchiliklarga yo‘l qo‘ydik. Bu ham qaysidir ma’noda shu kasb egalari haqida yetarlicha ma’lumotga ega emasligimizda pand berdi. Ularning qanaqa ekanligi yurtimiz boshiga kelgan sinovli kunlarda bilindi. Kechani kecha, kunduzni kunduz demay, tinim bilmay mehnat qilyapti, bizni o‘ylab uyda qolishimizni so‘rab, iltimos qilyapti. O‘zim nomimdan va ijodiy guruh nomidan ichki ishlar xodimlari haqida hajviya tayyorlaydigan bo‘lsak, uning orqasida nima yotganini o‘ylab dastur qilamiz, deb va’da beraman. Xatoliklar uchun afsusdamiz, pushaymondamiz”, — deydi “Sho‘rdanak” ko‘rsatuvi aktyori Erkin Cho‘liyev.
