Ўзбекистонда хизмат кўрсатган артист Беҳзод Муҳаммадкаримов «Дарё» интернет-нашри учун эксклюзив интервью берди. Интервьюни «Дарё» мухбири Феруз Муҳаммад ташкиллаштирди.
Беҳзод Муҳаммадкаримов суҳбат давомида АҚШга кетиб қолиш сабабларини маълум қилди.
АҚШга кетганимнинг сабаби битта эмас. Сабаблар мажмуаси йиғилиб қолгандан кейин кетишга тўғри келган. Биринчи сабаби молиявий масала бўлган. Ўша вақтда Ўзбекистонда хизмат кўрсатган артистман, театрда, фильмларда бош ролларни ижро этаман, дубляжда тинмасдан ишлайман, аммо топадиган пулим ойликдан ойликка етмас эди.Маълумот учун, Беҳзод Муҳаммадкаримов «Шайтанат», «Амир Темур», «Ўткан кунлар», «Паризод», «Оқ бино оқшомлари», «Тангалик болалар», «Сўғдиёна», «Омонат», «Буюк Турон» каби фильмларда турли даражадаги ролларни ижро этган.Акам тижорат билан шуғулланар эди, бу ойдан у ойга етиб олиш учун улардан 50-100 доллар қарз олиб яшардим. Ёшим ҳам ўттиз бешдан ошган, тоғни урсам талқон қиладиган ёшдаман, аммо шароит шунақа эди. Инфлация даражаси жуда юқори эди. Бу кетишимнинг биринчи сабаби бўлган.
Бундан ташқари ўша вақтда фильмлар суратга олинмади. Актёр бўлиб, энди кўксимизга шамол тегади, деган вақтимизда, фильмлар суратга олинмай қўйди. Бу ёқда бола-чақа катта бўлмоқда, ота бўлиб уларни ҳам моддий жиҳатдан таъминлаб қўйишим керак эди.
Бош қаҳрамонларни ижро этадиган актёрларнинг барчасида ўтиш даври бўлади. Яъни отани ўйнашга ёшлик қилиб қолади, ўғлини ижро этишга эса ёши катта бўлиб қолган вақт, аросат даври бўлади. Ўша даврда менда ҳам шундай вазият эди. Ўша вақтда жуда кўп актёр ва актрисалар ишсиз қолади.
Яна ўзимни Голливудда ҳам синаб кўриш ниятим ҳам бўлган. Аммо у ердаги реал аҳволни кўрганимдан кейин, у фикрдан кечганман. Тезроқ тирикчилик қилиб, уйга қайтиш ниятида тинмай ишлаганман.
Беҳзод Муҳаммадкаримов, Ўзбекистонда хизмат кўрсатган артист
Мавзуга доир: АҚШга кўчиб кетган ўзбекистонлик машҳурлар (фото)
Изоҳ (0)