Андижон шаҳар ИИО ФМБ бошлиғи ишдан олинди. Бир неча кун аввал унинг ходимлари қийнаган фуқаро вафот этган

Андижон вилояти Андижон шаҳар бўйича ички ишлар органлари (ИИО) фаолиятини мувофиқлаштириш бошқармаси (ФМБ) бошлиғи подполковник Содиқ Усмонов ишдан олинди. Бу ҳақда сенатор Қутбиддин Бурҳонов маълум қилди.

Сенаторнинг маълум қилишича, Андижон шаҳар ички ишлар органларининг раҳбари ҳисобланган Содиқ Усмонов Ўзбекистон ички ишлар вазири Пўлат Бобожоновнинг 14 июнь, якшанба кунги буйруғи билан эгаллаб турган лавозимидан озод этилган.

Маълумот учун, подполковник Содиқ Усмонов 2019 йил июнь ойида Андижон вилояти Андижон шаҳар бўйича ички ишлар органлари фаолиятини мувофиқлаштириш бошқармаси бошлиғи лавозимига тайинланган эди. Бунгача у Асака тумани ИИБ бошлиғи бўлган.

Аввалроқ Андижон шаҳар ИИО ФМБ 4-сон ИИБнинг ходимлари фуқаро А.А.ни ИИБ маъмурий биносига олиб келиб, унинг ҳаёти ва соғлиғи учун хавфли бўлган зўрлик ишлатиб, ноқонуний равишда ушлаб турган. А.А. соғлиғи ёмонлашганлиги сабабли Андижон шаҳар ИИО ФМБ 4-сон ИИБдан Республика шошилинч тиббий ёрдам илмий маркази Андижон филиалига ётқизилган ва 11 июнь куни вафот этган.

Ҳозирги вақтда ушбу ҳолат юзасидан ИИБнинг уч нафар ходимига нисбатан айблов эълон қилинган, улар қамоққа олинган. Бош прокуратурадан маълум қилишларича, ҳозирда жиноят иши бўйича дастлабки тергов ҳаракатлари олиб борилмоқда.

Эслатиб ўтамиз, январь ойида Қашқадарёда мол ўғирлашда гумон қилинган эркак ИИБ ходимлари томонидан калтакланиши оқибатида вафот этгани тўғрисида хабар берилганди.