Қашқадарёда 2020 йил даволаш иши йўналиши бўйича 106 нафар, тор соҳа мутахассислари бўйича эса 257 нафар, жами 363 нафар шифокорга эҳтиёж бор. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов маълум қилди.
Эгамовга кўра, айни кунда даволаш иши йўналиши бўйича Чироқчи тумани 29 нафар шифокорга эҳтиёж сезаётган бўлса, Миришкорга 19 нафар, Нишон туманига эса 16 нафар шифокор керак. Тор соҳа мутахассислари бўйича эса Чироқчида 62 нафар шифокор етишмаса, Нишонда 44, Касбида 31, Миришкорда эса 28 та бўш иш ўринлари бор.
Соғлиқни сақлаш бошқармаси масъулининг сўзига кўра, мутахассислар етишмаслигининг биринчи сабаби ойлик маош камлиги бўлса, ҳудудда мутахассис кадрлар камлиги муаммонинг иккинчи сабаби бўлмоқда.
«Дарё» мухбирининг аниқлаштиришича, вилоятдаги хусусий тиббиёт муассасаларида ишлаётган малакали шифокорлар 10 миллион сўмдан маош олаётган бўлса, давлат муассасаларида фаолият юритаётган шундай мутахассислар эса бундан тўрт-беш баравар кам маош учун ишлайди.
Аниқланишича, вилоят соғлиқни сақлаш бошқармаси бошлиғи лавозимидаги масъул айни кунда 1,5 миллион маош олади.
«Қолганларининг маоши қанчалигини тасаввур қилаверинг», — дейди «Дарё» мухбири билан суҳбатлашган соҳа вакили.
Эслатиб ўтамиз, Президентнинг 2018 йил 7 ноябрь кунидаги «Давлат тиббиёт муассасалари ва соғлиқни сақлашни бошқариш органлари ходимларини моддий рағбатлантиришни кучайтириш чора-тадбирлари тўғрисида»ги қарорига кўра, тиббиёт ва фармацевтика ходимларининг ойлиги 2018 йил 1 декабрдан 1,2 баравар ва 2019 йил 1 апрелдан 1,15 баравар босқичма-босқич оширилганди.
Изоҳ (0)