«Бунёдкор» Тошкентда «Қўқон-1912»ни қабул қилади, ОКМК эса Навоийда меҳмон бўлади. Суперлига 90 кунлик танаффусдан сўнг яна қайтмоқда

Коронавирус туфайли юзага келган танаффусдан кейин футбол бўйича Ўзбекистон чемпионатига ҳам рестарт берилади.

13 июнь, шанба кунидан Суперлиганинг навбатдаги тури старт олади. Махсус комиссия томонидан 5 июндан мамлакатнинг «яшил» тоифали ҳудудларида Суперлига ва бошқа футбол мусобақаларини ўтказишга рухсат берилди. Бироқ ПФЛ узоқ вақт машғулотлар ўтказмаган клубларга мавсум рестартига тайёргарлик кўриш учун вақт берди.

13 июнь кунидан иккита учрашув ўрин олган. Тур баҳсларини «Бунёдкор» ва «Қўқон-1912» жамоалари ўртасидаги учрашув очиб беради. Ҳар икки жамоа ҳам мавсумни ёмон бошламади: уч ўйинда иккита ғалаба.

Яна бир учрашувга Навоий шаҳри мезбонлик қилади. Унда «Қизилқум» ўзида ОКМКни қабул қилади. Мавсумни жуда омадсиз бошлаган «Қизилқум» янги мураббий қўл остида майдонга тушади. Тачмурод Агамуродов ушбу ой бошида жамоани қабул қилиб олганди. Миржалол Қосимов шогирдлари эса жорий мавсумда мағлубиятга учрамаган уч жамоадан бири бўлиб турибди.

14 июнь, якшанба кунида ҳам иккита учрашув бўлиб ўтади. Мусобақа пешқадами — «Пахтакор» сафарда «Сўғдиёна» билан баҳс юритади. Турнинг марказий учрашуви эса Қаршида бўлиб ўтади. Унда «Насаф» Наманганнинг «Навбаҳор» жамоасини имтиҳондан ўтказади.

15 июнь, душанба куни турнинг қолган учта ўйини ўтказилади. «Сурхон» ўзида «Машъал»ни қабул қилади. Жорий мавсум бирорта ҳам очко тўплай олмаган ягона жамоа — «Бухоро» эса «Андижон»ни меҳмон қилади. Андижонликлар ҳам танаффус вақтида ўзгаришларга қўл урди, жамоага Виктор Кумиков бош мураббий этиб тайинланди.

Турни якунлаб берувчи баҳс «Локомотив» ва «Металлург» ўртасида кечади. Мазкур ўйин аввалига Бекободда ўтиши белгиланганди, бироқ шаҳарнинг «қизил» ҳудудга киргани боис ўйин Тошкентга кўчирилган.

Барча учрашувлар жонли эфирга узатилади.