Аввал хабар берилганидек, Республика махсус комиссияси қарорига кўра, Ўзбекистонда 8 июндан бошлаб «сариқ» ва «яшил» ҳудудларда жамоат транспортида шаҳар (туман) ва шаҳар атрофи йўналишлари бўйича автобус ҳаракатларига рухсат берилган. «Тошшаҳартрансхизмат» АЖ томонидан автобус ҳайдовчилари учун кунлик режалар бекор қилинган.
Айни вақтга келиб «Тошшаҳартрансхизмат» АЖ таркибига кирувчи 16 та автокорхона (8 та автобус саройи ва 8 та хусусий ташувчи)га жами 152 та автобус йўналишлари (шундан 135 таси автобус саройларига ва 17 таси хусусий корхоналарга тегишли) бириктирилган бўлиб, ушбу йўналишларга режа бўйича жами 1230 та автобус (шундан 1121 та автобус саройлари бўйича ва 109 та хусусий корхоналар бўйича) ишга чиқарилган.
Фаолияти қайта тикланадиган йўналишларнинг ҳаракати Махсус комиссия қарорига кўра соат 6:00 дан 22:00 гача ташкил қилинган.
Мавзуга доир: Жамоат транспортисиз Тошкент: сони ортган велосипед ҳайдовчилари, бўш кўчалар ва бекатлар — суратларда
Йўналишларнинг сўнгги бекатларида автобусларни доимий равишда ҳар бир қатновга жўнашидан олдин тўлиқ дезинфекция қилинади. Ҳайдовчилар тиббий ниқоб ва қўлқоплар билан таъминланиб, ушбу воситалар мунтазам равишда ўз вақтида алмаштириб борилади. Автобуслар салонига фақатгина тиббий ниқобдаги йўловчилар киритилмоқда.
«Дарё» мухбири пойтахтнинг айрим кўчаларида бўлиб фаолияти қайта йўлга қўйилган жамоат транспорти ҳаракатини кадрларга муҳрлади.
Эслатиб ўтамиз, коронавирус пандемияси туфайли 22 мартдан буён Тошкент шаҳрида жамоат транспорти ҳаракати тўхтатилган эди. 4 июнда эълон қилинган Республика махсус комиссиясининг қарорида 15 июндан ҳудудлараро автобус қатновларига ҳам рухсат берилиши, бироқ шаҳар жамоат транспорти ҳаракатига чеклов сақланиб қолиши қайд этилганди. 8 июндан ҳаракатига рухсат этилган жамоат транспортларида сал аввалроқ «Тошшаҳартрансхизмат» дастлабки кунларда айрим йўналишларда карантин қоидаларининг қўпол равишда бузилиши ҳолатлари кузатилаётганини маълум қилган.
Изоҳ (0)