Санъаткор ота-онасининг йўлини тутган ўзбекистонлик актёр ва хонандалар (фото)

Ота ва онасининг санъатдаги фаолиятини муносиб равишда давом эттираётган ўзбек шоу-бизнеси вакиллари ҳақида сўз юритамиз.

Ўзбекистонда хизмат кўрсатган артист Равшан Комиловнинг ўғли Фарруҳ отаси изидан бориб санъат йўлини танлаган. Унинг «Ҳар тараф» деб номланган илк қўшиғи Фарруҳга муваффақият олиб келган.

Ёш хонанда Жавлон Олимов 90 йилларнинг хит қўшиқлари муаллифи, хушовоз хонанда Аваз Олимовнинг ўғли.

Ўзбекистон халқ артисти Юлдуз Усмонованинг якка-ю ягона фарзанди Нилуфар Усмонова мутахассислиги бўйича ҳуқуқшунос. Бироқ у ҳозирда онасининг изидан бориб, санъат соҳасида фаолият юритмоқда.

Ўзбекистонда хизмат кўрсатган артист Илҳом Фармоновнинг ўғли Ислом ҳам ота касбини давом эттириб, қўшиқлар куйламоқда.

Таниқли актёрлар Гулчеҳра ва Лутфулла Саъдуллаевларнинг кенжа фарзанди Муқаддас уларнинг йўлини танлаган. Муқаддас кинодаги фаолиятини клипларда суратга тушишдан бошлаган.

Ўзбекистон халқ артисти Муқаддас Ҳолиқованинг қизи Зебунисо ҳам онаси билан биргаликда Ўзбек миллий академик драма театрида актриса сифатида фаолият юритади. У бир неча фильмларда ҳам турли образларни гавдалантирган.

Хушовоз хонанда Азиз Ражабий машҳур сулоланинг муносиб давомчиси эканлиги ҳеч кимга сир эмас. Унинг бобоси Юнус Ражабий, отаси Ҳасан Ражабийлар ўзбек санъати ривожига сезиларли ҳисса қўшган санъаткорлардир.

Ўзбекистонда хизмат кўрсатган артист Раъно Ярашеванинг қизи Мадина Мумтоз ҳам онаси изидан борганлардан. У санъатдаги фаолиятини хонандаликдан бошлаган. Кейинчалик эса бир неча клип ва фильмларда суратга тушган.

Ўзбекистон халқ артисти Ортиқ Отажоновнинг фарзанди Улуғбек Отажонов ота касбининг муносиб давомчиси.

Актёр Азиз Раметов таниқли актёрлар Саида ва Жумадулла Раметовларнинг кенжа фарзанди.

Зокировлар сулоласи вакиллари Гавҳар ва Жамшид Зокировларнинг фарзанди Жавоҳир Зокиров бугунги кунда эл суйган санъаткор.

Истеъдодли актёр ва режиссёр Алишер Узоқов таниқли актёрлар Шоҳида ва Муҳаммаджон Узоқовларнинг фарзанди.

Таниқли актриса Зарина Низомиддинова Ўзбекистонда хизмат кўрсатган артист, «Ялла» гуруҳининг илк хонандаларидан бири Шаҳбоз Низомиддиновнинг қизи эканлигини кўпчилик билмаса керак. Санъаткорнинг фарзандлари орасидан фақат Зарина ота касбини танлаган.

Ўзбекистонда хизмат кўрсатган артист Рашид Ҳолиқовнинг тўнғич фарзанди Санжар отасининг изидан бориб, хонанда бўлди.

Райҳон Ғаниеванинг ўзбек киносининг асосчиларидан бири Наби Ғаниевнинг авлодидан. Унинг ота-онаси Отабек Ғаниев ва Тамара Шокировалар таниқли актёрлар эди.

Режиссёр Баҳодир Йўлдошев ва актриса Римма Аҳмедоваларнинг ўғли Бобур Йўлдошев бугунги кунда санъаткорларнинг касбини муносиб равишда давом эттирмоқда.

Ўзбекистон халқ артисти Шерали Жўраевнинг икки ўғли Шоҳжаҳон ва Зоҳиршоҳлар ота касбини танлаган. Уларнинг ҳар бири бугунги кунда машҳур санъаткор.