«Сеними, шошмай тур!»даги Бўри жинси ва кроссовка кийиб олди. «Союзмультфильм» афсонавий мультфильмни қайта тақдим этишга тайёрланмоқда

«Сеними, шошмай тур!» мультфильмидаги Бўрининг 50 та янги вариант тақдим этилди. У ўз имижини ўзгартириб, анча замонавийлашди, деб хабар беради Esquire.

«Машҳур эпопея қайта тақдим этилмоқда: Бўри ва Қуён замонавий қиёфага эга бўлади ва улар 3D-техникалар ёрдамида яратилган. Кул ранг салбий қаҳрамон образини танлаш узоқ вақт олди: ташқи кўринишининг 50, соч турмагининг 18 ва думининг 4 та варианти тадқим этилди», — деб ёзади Mash.

Таъкидланишича, «Союзмультфильм» Бўрига овоз бериш учун синовдан ўтган актёрларга унинг қуйидаги суратини юборган:

Кейинроқ «Союзмультфильм» бу якуний вариант эмаслигини маълум қилган.

«Янги мулцериал режиссёр Вячеслав Котёночкин томонидан яратилган машҳур классик версиянинг тўғридан-тўғри давоми бўлмагани сабаб, лойиҳанинг ижодий гуруҳи замонавий график услуб қидириш билан шуғулланмоқда. Хусусан, ҳозирда Бўрининг 50 дан ортиқ турли эскизлари яратилган. Лойиҳанинг дастлабки сериялари устида ишлар давом этмоқда», — дейди студия матбуот котиби Марина Малигина.

Аввалроқ «Союзмультфильм» раҳбари Юлия Слашчева «Сеними, шошмай тур!» мулцериалининг янги эпизодлари замонавий томошабинлар учун қайта тақдим этиш режалаштирилаётганини ва у 52 қисмдан иборат бўлишини маълум қилганди.