«Қалпоқ» ҳамда «Шўрданак» ҳажвий кўрсатувлари ижодкорлари ЙҲХБ ходимлари ҳақидаги ҳазиллари учун ички ишлар органлари ходимларидан кечирим сўради.
«Қалпоқ» кўрсатувида спиртли ичимлик ичиб, машина бошқарган ҳайдовчи акасининг формасини кийиб кўчага чиққан ЙҲХБ ходимига пора бергани кўрсатилган.
«‘ГАИ’ ва милиция ходимлари устидан бундай ҳазил қилишимиз нотўғри аслида. Ҳеч қайси ‘ГАИ’ ҳайдовчини тўхтатиб пора олмайди. Ҳайдовчиларнинг ўзи ‘Отам касал, энам ўлиб қолди’, деб уларнинг раҳмини келтириб, нимадирлар қилади. ‘ГАИънинг пул сўраши ҳаётда бўлмаган. Мен бирорта ‘ГАИъни ёмон демайман», — дейди «Қалпоқ» ҳажвий кўрсатуви актёри Раҳмонали Суробов.
«Шўрданак» кўрсатуви актёрлари эса ЙҲХБ ходимларининг ҳайдовчини сабабсиз тўхтатиб, ундан пул ундирмоқчи бўлганини кўрсатган. Шунингдек, ушбу кўрсатувда ҳайдовчи ўт ўчириш мосламаси ва дори қутиси сотиб олмагани учун тез ёрдам ва ўт ўчириш машинаси билан бирга юргани ҳам акс эттирилган.
«‘ГАИ’ ходимлари ҳақида биз аввал ҳам ҳазиллар қилганмиз, бироқ шу сафар бироз хато-камчиликларга йўл қўйдик. Бу ҳам қайсидир маънода шу касб эгалари ҳақида етарлича маълумотга эга эмаслигимизда панд берди. Уларнинг қанақа эканлиги юртимиз бошига келган синовли кунларда билинди. Кечани кеча, кундузни кундуз демай, тиним билмай меҳнат қиляпти, бизни ўйлаб уйда қолишимизни сўраб, илтимос қиляпти. Ўзим номимдан ва ижодий гуруҳ номидан ички ишлар ходимлари ҳақида ҳажвия тайёрлайдиган бўлсак, унинг орқасида нима ётганини ўйлаб дастур қиламиз, деб ваъда бераман. Хатоликлар учун афсусдамиз, пушаймондамиз», — дейди «Шўрданак» кўрсатуви актёри Эркин Чўлиев.
Изоҳ (0)