Ota va onasining san’atdagi faoliyatini munosib ravishda davom ettirayotgan o‘zbek shou-biznesi vakillari haqida so‘z yuritamiz.
O‘zbekistonda xizmat ko‘rsatgan artist Ravshan Komilovning o‘g‘li Farruh otasi izidan borib san’at yo‘lini tanlagan. Uning “Har taraf” deb nomlangan ilk qo‘shig‘i Farruhga muvaffaqiyat olib kelgan.
Yosh xonanda Javlon Olimov 90-yillarning xit qo‘shiqlari muallifi, xushovoz xonanda Avaz Olimovning o‘g‘li.
O‘zbekiston xalq artisti Yulduz Usmonovaning yakka-yu yagona farzandi Nilufar Usmonova mutaxassisligi bo‘yicha huquqshunos. Biroq u hozirda onasining izidan borib, san’at sohasida faoliyat yuritmoqda.
O‘zbekistonda xizmat ko‘rsatgan artist Ilhom Farmonovning o‘g‘li Islom ham ota kasbini davom ettirib, qo‘shiqlar kuylamoqda.
Taniqli aktyorlar Gulchehra va Lutfulla Sa’dullayevlarning kenja farzandi Muqaddas ularning yo‘lini tanlagan. Muqaddas kinodagi faoliyatini kliplarda suratga tushishdan boshlagan.
O‘zbekiston xalq artisti Muqaddas Holiqovaning qizi Zebuniso ham onasi bilan birgalikda O‘zbek milliy akademik drama teatrida aktrisa sifatida faoliyat yuritadi. U bir necha filmlarda ham turli obrazlarni gavdalantirgan.
Xushovoz xonanda Aziz Rajabiy mashhur sulolaning munosib davomchisi ekanligi hech kimga sir emas. Uning bobosi Yunus Rajabiy, otasi Hasan Rajabiylar o‘zbek san’ati rivojiga sezilarli hissa qo‘shgan san’atkorlardir.
O‘zbekistonda xizmat ko‘rsatgan artist Ra’no Yarashevaning qizi Madina Mumtoz ham onasi izidan borganlardan. U san’atdagi faoliyatini xonandalikdan boshlagan. Keyinchalik esa bir necha klip va filmlarda suratga tushgan.
O‘zbekiston xalq artisti Ortiq Otajonovning farzandi Ulug‘bek Otajonov ota kasbining munosib davomchisi.
Aktyor Aziz Rametov taniqli aktyorlar Saida va Jumadulla Rametovlarning kenja farzandi.
Zokirovlar sulolasi vakillari Gavhar va Jamshid Zokirovlarning farzandi Javohir Zokirov bugungi kunda el suygan san’atkor.
Iste’dodli aktyor va rejissor Alisher Uzoqov taniqli aktyorlar Shohida va Muhammadjon Uzoqovlarning farzandi.
Taniqli aktrisa Zarina Nizomiddinova O‘zbekistonda xizmat ko‘rsatgan artist, “Yalla” guruhining ilk xonandalaridan biri Shahboz Nizomiddinovning qizi ekanligini ko‘pchilik bilmasa kerak. San’atkorning farzandlari orasidan faqat Zarina ota kasbini tanlagan.
O‘zbekistonda xizmat ko‘rsatgan artist Rashid Holiqovning to‘ng‘ich farzandi Sanjar otasining izidan borib, xonanda bo‘ldi.
Rayhon G‘aniyevaning o‘zbek kinosining asoschilaridan biri Nabi G‘aniyevning avlodidan. Uning ota-onasi Otabek G‘aniyev va Tamara Shokirovalar taniqli aktyorlar edi.
Rejissor Bahodir Yo‘ldoshev va aktrisa Rimma Ahmedovalarning o‘g‘li Bobur Yo‘ldoshev bugungi kunda san’atkorlarning kasbini munosib ravishda davom ettirmoqda.
O‘zbekiston xalq artisti Sherali Jo‘rayevning ikki o‘g‘li Shohjahon va Zohirshohlar ota kasbini tanlagan. Ularning har biri bugungi kunda mashhur san’atkor.
Izoh (0)