Ўзбекистон Республикаси Фанлар академияси Биоорганик кимё институти олимлари SARS CoV-2 коронавируси таъсирини 78,3 фоизга сусайтириш хусусиятига эга бўлган «Рутан» номли дорини яратди. Бу ҳақда Фармацевтика тармоғини ривожлантириш агентлиги матбуот хизмати хабар берди.
Маълум қилинишича, 9 июнь куни Инновацион ривожланиш вазирлиги China—Uzbekistan Medicine Technical Park технопаркида ишлаб чиқилган 19 500 дона «Рутан» дори воситасини Ўзбекистон Соғлиқни сақлаш вазирлигига беғараз тақдим этди.
Ўзбекистон Республикаси Фанлар академияси Биоорганик кимё институти томонидан яратилган гриппга қарши оригинал «Рутан» дори воситаси Хитой олимлари томонидан ўтказилган синовлар натижасида SARS CoV-2 типидаги вирус таъсирини 78,3 фоизга сусайтириш хусусиятини намоён қилган.
Агентлик томонидан қайд этилишича, «Рутан» дориси GMP (Good Manufacturing Practic) талабларига жавоб берувчи Хитой—Ўзбекистон тиббий технопаркида тайёр дори воситаси сифатида ишлаб чиқилди. 11 мингта ўрамдаги «Рутан» дори воситаси коронавирусга қарши гуманитар ёрдам сифатида Эронга юборилиб, лаборатория синовларидан ижобий ўтган.
Маълум қилинишича, Инновацион ривожланиш вазирлиги билан ҳамкорликда ишга туширилган Ўзбек—Хитой илмий-технологик паркига 20 миллион доллар миқдорида инвестиция киритилган бўлиб, 300 та иш ўрни ташкил этилган.
Бугунги кунга келиб технопаркда дори препаратларининг 8 хил кўринишдаги (таблеткалар, капсулалар, суюқ кўринишдаги ва бошқа) турларини ишлаб чиқарадиган фармацевтика заводи фаолият юритмоқда.
Аввалроқ Ўзбекистон Инновацион ривожланиш вазирлиги ҳузуридаги Илғор технологиялар маркази ходимлари коронавирусни аниқлаш учун тест тизимини ишлаб чиқиш устида иш олиб бораётгани ва мазкур тест тизимлари Тошкентда коронавирусга чалинган беморларда синовдан ўтказилаётгани ҳақида хабар берилганди.
Изоҳ (0)