«Давлат геология ва минерал ресурслар қўмитаси тизимида Геология фанлари университети фаолиятини ташкил этиш чора-тадбирлари тўғрисида»ги Президент қарори эълон қилинди.
Мазкур қарор билан геология соҳасида юқори малакали ва замонавий фикрловчи олий маълумотли кадрларни тайёрлаш мақсадида Геология фанлари университети ташкил этилди.
Университет Давлат геология қўмитаси, тоғ-кон саноати корхоналари ва иқтисодиётнинг бошқа тармоқлари учун геология йўналишидаги малакали кадрлар тайёрлаш ҳамда илмий-тадқиқот ишларини бажариш бўйича республиканинг ихтисослашган олий таълим ва илмий-тадқиқот муассасаси ҳисобланади.
Ҳ.Абдуллаев номидаги Геология ва геофизика институти, Минерал ресурслар институти, Гидрогеология ва муҳандислик геологияси институти, Нефть-газ конлари геологияси ва қидируви институти, Геология соҳаси кадрлари малакасини ошириш ва қайта тайёрлаш институти ҳамда Давлат геология музейи университет таркибига киради.
Университетга талабалар ҳар йили тасдиқланадиган республика олий таълим муассасаларига ўқишга қабул қилиш параметрларидан келиб чиққан ҳолда давлат буюртмаси ҳамда тўлов-контракт асосида қабул қилинади.
Талабалар республикадаги давлат таълим стандартлари асосида геология ва кончилик йўналишидаги етакчи хорижий олий таълим муассасалари, шу жумладан, Санкт-Петербург кончилик университетининг қўшма таълим дастурлари бўйича улар билан эришиладиган келишувларга мувофиқ ўқитилади.
2020 йил 1 сентябрга қадар Давлат геология қўмитаси, Олий ва ўрта махсус таълим вазирлиги ҳамда Вазирлар Маҳкамаси ҳузуридаги Давлат тест маркази билан биргаликда 2020/2021-ўқув йили учун университетга талабаларни қабул қилиш жараёни талабга мувофиқ ўтказилади.
Университет ҳузурида етакчи геология ва кончилик йўналишидаги хорижий олий таълим муассасаларининг, шу жумладан, Санкт-Петербург кончилик университетининг махсус умумтаълим ва базавий техник фанларини ўқитишга ихтисослашган Бошланғич муҳандислик тайёрлаш маркази ташкил этилади.
Университет 2020/2021-ўқув йилида И.Каримов номидаги Тошкент давлат техника университети биносига текин фойдаланиш ҳуқуқи асосида жойлаштирилади.
Аввал Андижон қишлоқ хўжалиги ва агротехнологиялар институтини ташкил этиш ҳақидаги қарор лойиҳаси муҳокамага қўйилгани, Тошкентда Санкт-Петербург давлат университетининг филиали очилиши ҳамда Япония рақамли университети ташкил этилиши, шунингдек, Ангренда Жанубий Кореянинг Кукмин университетининг фаолият бошлаши ҳақида хабарлар берилган. 2020 йил 6 майда эса Тошкент давлат транспорт университети ташкил этилганди.
Изоҳ (0)