iPhone 11, 11 Pro ва 11 Pro Max моделларининг айрим эгалари экрандаги барча ранглар вақти-вақти билан яшил тусга кириб қолаётганидан шикоят қилмоқда, деб хабар беради «Hi-Tech.Mail.ru».
Ушбу муаммога дуч келган фойдаланувчилар деярли битта сценарийни тасвирламоқда — смартфон блокдан чиқарилгач унинг экрани бир неча сония яшил рангга кириб қоляпти ва шундан кейингина ўзининг нормал ҳолатига қайтмоқда.
iPhone 11 линейкасидаги смартфонлар экрани турли сабаблар билан яшил тусга кирмоқда, хусусан, дисплейдаги оқ рангни қоронғуликда кўзга қулайлаштирувчи Night Swift режимини ёққанда. Шунингдек, бу каби муаммо смартфон ёруғлиги минимумга қадар туширилганида ҳам пайдо бўлмоқда.
Ҳозирда ушбу муаммонинг ечими йўқ. Баъзида смартфонни ўчириб-ёқиш фойда бермоқда, бироқ барибир айрим смартфонлар экрани яшил тусга кириб қоляпти. Ҳалигача мазкур хатолик дастурий таъминотдами ёки барча уч моделдаги оммавий нуқсонми, номаълум. Apple ҳозирча вазиятга изоҳ бермади, тахминларга кўра, компания муаммони ўрганмоқда.
Таъкидлаш керакки, iPhone 11 модели 2020 йилнинг биринчи чораги натижаларига кўра, энг оммабоп смартфонга айланган, шу сабабли юқоридаги муаммо тасдиқланса, компанияга жуда катта зарар келтириши мумкин.
Изоҳ (0)