Тожикистон футбол федерацияси мамлакат чемпионати ўйинлари қайта тикланишини эълон қилди.
Миллий чемпионатнинг 5-тур ўйинлари 16 июнь санасидан давом эттирилади. Эҳтиёткорлик юзасидан учрашувлар томошабинларсиз ўтказилишда давом этади.
Шу билан бирга, Тожикистон футбол федерацияси давралар сонини ҳам учтадан иккитага қисқартиришга қарор қилган. Ушбу ҳолатда жамоалар мавсум якунига қадар 18 тадан ўйин ўтказади.
Мажбурий танаффус юзага келгунига қадар жамоалар 4 та турда майдонга тушишга улгурганди. Душанбенинг «Истиқлол» ва Бохтарнинг «Хатлон» клублари 10 очкодан тўплаб, турнир жадвалида пешқадамлик қилмоқда.
Тожикистон Олий Лигаси клублари 1 июнь куни машғулотларни бошлаган.
Эслатиб ўтамиз, чемпионат коронавирус пандемияси сабаб апрель ойи охирида тўхтаб қолганди.
Маълумот учун, 7 июнь ҳолатига кўра Тожикистонда коронавирус юқтирганлар сони 4529 нафарни ташкил қилади, касалланганлардан 2673 киши тузалган бўлса, 48 киши вафот этган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)