Каталониянинг «Барселона» клуби бош мураббийи Кике Сетьен ҳужумчи Лионель Мессининг ҳолати ҳақида гапирди.
«Унда кичик шикастланиш бор, аммо бу жиддий эмас. У ажойиб формада ва майдонга туша олади.
Унинг ҳолати қолганларники билан бир хил. Вазиятдан келиб чиқиб, жамоа учун фойдали бўлган қарорни қабул қиламиз. Шунингдек, бизда унчалик ҳам катта таркиб йўқлигини ёддан чиқармаслик зарур.
Албатта, мен Мессининг доимо майдонда бўлишини афзал кўраман, бироқ нима бўлишини вақт кўрсатади», — дейди Сетьен.
Аввалроқ 32 ёшли аргентиналик футболчининг сон мушаклари чўзилгани ва якка тартибда машғулот ўтказаётгани айтилганди.
Месси жорий мавсум Ла Лигада 22 та ўйин ўтказиб, 19 та гол урган ва 12 та голга ҳаммуаллифлик қилган. Унинг каталон клуби билан амалдаги шартномаси 2021 йилгача амал қилади.
Эслатиб ўтамиз, «Барселона» танаффусдан кейин дастлабки ўйинини 13 июнь куни «Мальорка»га қарши ўтказади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)