Профессионлар футбол лигаси (ПФЛ) «Бухоро» футбол клубида раҳбарият алмашинуви юзасидан суриштирув иши очди. Бу ҳақда ташкилот расмий сайтида маълум қилинди.
Маълум бўлишича, 5 июнь куни Суперлига иштирокчиси бўлган «Бухоро» футбол клубида навбатдан ташқари йиғилиш ўтказилган ҳамда амалдаги директор Жамшид Ботиров ишдан олинган.
Бухоро шаҳар ҳокимлиги ҳамда вилоят жисмоний тарбия ва спорт бошқармасидан вакил иштирок этган йиғилишда Алишер Рустамов «Бухоро» футбол клубининг янги директори сифатида таништирилган. Алишер Рустамов бундан аввал ҳам икки бор мазкур лавозимга тайинланганди.
Бироқ ПФЛнинг маълум қилишича, «Бухоро» бу борада ташкилотни хабардор қилмаган ва бу орқали мусобақалар ўтказиш регламентининг 6.15 бандини бузган.
«Карантин давридан кейин қайтаётган футбол мавсуми арафасида ЎзПФЛ вазиятдан келиб чиқиб бир қатор масалаларни қайта кўриб чиқишга, айримларини ўзгартиришга мажбур. Мана шундай вақтда «Бухоро» клуби раҳбариятидаги ноаниқликлар ПФЛ ишини қийинлаштиради. Сабаби, ташкилот на расман огоҳлантирилди ва на янги директор тайинлови расман протоколлаштирилди. ПФЛ уч кундан буён йиғилиш протоколини қўлга кирита олмади.
Айни вақтда «Бухоро» футбол клубининг Бухоро шаҳар ҳокимлигига тегишли бўлган 20 фоизлик улушни, Бухоро нефтни қайта ишлаш заводига тегишли бўлган 80 фоизлик улушни Давлат активларини бошқариш агентлигига ўтказиш ишлари олиб бориляпти.
«Бухоро ПФК» МЧЖ уставининг 15.2 бандига мувофиқ футбол клуби директори таъсисчиларнинг умумий йиғилиши томонидан тайинланиши ва лавозимидан озод қилиниши белгиланган.
Мана энди савол туғилади. «Бухоро» футбол клубининг янги директори қайси асосга кўра лавозимига тайинланди? Лавозимга тайинлаш жараёнидан Бухоро нефтни қайта ишлаш заводи хабардор этилдими ёки иштироки таъминландими?
Директорни тайинлашни расмийлаштириш билан боғлиқ тегишли ҳужжатлар ПФЛга ўз вақтида тақдим этилмагани, «Бухоро» футбол клубининг янги директори қайси асосга кўра лавозимга тайинланганини аниқлаштириш заруриятини вужудга келтирмоқда», — дейилади ташкилот баёнотида.
Маълумот учун, ишдан олдинган «Бухоро» директори Жамшид Ботиров 2020 йилнинг январь ойида мазкур лавозимга тайинланган эди.
Эслатиб ўтамиз, «Бухоро» коронавирус туфайли тўхтаб қолган Суперлига жорий мавсумида 3 та турдан сўнг бирорта ҳам очко тўплай олмай, сўнгги поғонада бормоқда. Суперлига 13 июндан давом этади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)