Ижтимоий тармоқларда Тошкент шаҳар ИИББ бошлиғига манба ҳавола қилинган ҳолда, автомобилда тиббий ниқобсиз бўлиш мумкинлиги ҳақидаги маълумотлар тарқалмоқда. Идора ахборот хизматининг маълум қилишича, автомобиль ҳайдовчиси ниқоб тақиши мажбурий эмас.

Фото: «Дарё»

«Ҳақиқатaн ҳам шахсий автомобиль ҳайдовчиси машинада тиббий ниқобсиз бўлиши мумкин (такси ҳайдовчиларига тааллуқли эмас), аммо шу билан бирга қуйидаги шартларга риоя қилиш керак: биринчидан, ҳайдовчи автомобиль салонида ёлғиз бўлиши керак. Иккинчидан, ҳайдовчи фақат автомобиль ҳаракатланиш вақтида ниқобсиз бўлиши мумкин. Яъни агар ҳайдовчи йўл четида тўхтаса, тиббий ниқобни тақиб олиши керак», — дейилади хабарда.

Эслатиб ўтамиз, Ўзбекистон ҳудудлари эпидемиологик вазиятдан келиб чиқиб 8 майдан эътиборан «яшил», «сариқ» ва «қизил» тоифаларга ажратиб чиқилган эди. 15 майдан барча тоифалардаги ҳудудларда айрим карантин чекловлари юмшатилган. 18 майдан «сариқ» тоифадаги ҳудудларда шахсий автотранспорт воситаларини стикерсиз соат 06:00 дан 22:00 гача бошқаришга, «яшил» ҳудудларда эса умуман чекловсиз фойдаланишга рухсат берилган эди. Республика махсус комиссиясининг қарори билан амалдаги карантин талаблари 2020 йил 15 июнга қадар узайтирилган.