Тошкент шаҳрида 8 июндан бошлаб қайси автобуслар ҳаракатига рухсат берилиши маълум бўлди

Республика махсус комиссиясининг қарорига мувофиқ, 2020 йил 8 июндан бошлаб «сариқ» ва «яшил» тоифасига кирувчи ҳудудларда, жумладан, Тошкент шаҳрида автобус йўналишлари фаолиятини қайта тиклаш белгиланган. Тошкент шаҳар ҳокимлиги пойтахтда қайси йўналишдаги автобусларнинг ҳаракати бошланиши ҳақида маълумот берди.

Хабарга кўра, «Тошшаҳартрансхизмат» АЖ таркибига кирувчи 16 та автокорхона (8 та автобус саройи ва 8 та хусусий ташувчи)га жами 152 та автобус йўналишлари (шундан 135 таси автобус саройларига ва 17 таси хусусий корхоналарга тегишли) бириктирилган бўлиб, ушбу йўналишларга режа бўйича жами 1230 та автобус (шундан 1121 та автобус саройлари бўйича ва 109 та хусусий корхоналар бўйича) ишга чиқарилиши режалаштирилган.

Махсус комиссия қарори талабларидан келиб чиққан ҳолда, 2020 йилнинг 8 июнь кунидан бошлаб «Тошшаҳартрансхизмат» АЖ таркибига кирувчи автокорхоналар томонидан 131 та йўналишларга 1067 та турли русумдаги (Mercedes-Benz, MAN, SAZ ва Isuzu) автобус ишга чиқарилади.

Республика махсус комиссиясининг қарорига мувофиқ, Тошкент вилоятининг Қибрай, Тошкент, Зангиота туманлари «қизил» ҳудуд деб эълон қилинганлиги муносабати билан автокорхоналарга бириктирилган — Тошкент вилоятининг мазкур туманлари ҳудудигача ҳаракатланувчи 21 та (8т, 9, 16, 25, 42, 56, 65, 74, 84, 101, 103, 115, 120, 134, 135, 144, 145, 148, 188, 198, 199-сонли) автобус йўналишлари вақтинчалик фаолият юритмайди.

Йўловчилар ташиш узлуксизлигини таъминлаш мақсадида 3 та (75, 106, 160-сонли) автобус йўналишларининг фаолияти фақатгина Тошкент шаҳри ҳудудида Тошкент вилояти ҳудудига ҳаракатланмаган ҳолда ташкил этилади.

Фаолияти қайта тикланадиган йўналишларнинг ҳаракати Махсус комиссия қарорига кўра соат 6:00 дан 22:00 гача ташкил қилинади.

Барча автобус саройлари раҳбарлари томонидан йўналишларнинг сўнгги бекатларида икки сменалик навбатчилик ташкил қилинади.

Йўналишларнинг сўнгги бекатларида автобусларни доимий равишда ҳар бир қатновга жўнашдан олдин тўлиқ дезинфекция қилинади. Ҳайдовчилар тиббий ниқоб ва қўлқоплар билан таъминланиб, ушбу воситалар мунтазам равишда ўз вақтида алмаштириб борилади. Автобуслар салонига фақатгина тиббий ниқобдаги йўловчилар киритилади, дейилган хабарда.

4 июнда эълон қилинган Республика махсус комиссиясининг қарорида 15 июндан ҳудудлараро автобус қатновларига ҳам рухсат берилиши, бироқ шаҳар жамоат транспорти ҳаракатига чеклов сақланиб қолиши қайд этилганди. Бироқ кейинчалик 5 июнда Ўзбекистонда 8 июндан «сариқ» ва «яшил» ҳудудларда жамоат транспортида ҳаракатланишга рухсат берилди. Тошкентда автобус ҳайдовчилари учун қўйилган кунлик «план» бекор қилиниши хабар қилинди.