Xodimlarini Toshkent shahrida doimiy ro‘yxatga qo‘yish uchun rahbarlari iltimosnoma taqdim etishi mumkin bo‘lgan tashkilotlar soni yana beshtaga ko‘paydi. Bu haqda Adliya vazirligi xabar berdi.
Ma’lum qilinishicha, hukumatning ayrim qarorlariga kiritilgan o‘zgartirishlarga ko‘ra, rahbarlari xodimlarni Toshkent shahri va Toshkent viloyatida doimiy propiska qilish to‘g‘risida iltimosnoma kiritishi mumkin bo‘lgan davlat hokimiyati organlari, davlat va xo‘jalik boshqaruvi organlari, respublika ahamiyatiga molik boshqa davlat tashkilotlari ro‘yxatiga quyidagilar kiritildi:
- Energetika vazirligi;
- “O‘ztransgaz” AJ;
- “Hududgazta’minot” AJ;
- “Issiqlik elektr stansiyalari” AJ;
- “Hududiy elektr tarmoqlari” AJ.
Mazkur qonunga ko‘ra, Toshkentda joylashgan davlat tashkilotlarida 5 yil muddat mobaynida uzluksiz mehnat faoliyatini yuritayotgan mutaxassislar mazkur hududlarda doimiy yashash joyi bo‘yicha ro‘yxatga olinadi.
Vazirlar Mahkamasining “O‘zbekiston Respublikasida doimiy va vaqtincha propiska qilish tartibini yanada soddalashtirish chora-tadbirlari to‘g‘risida”gi qaroriga 2020-yil 22-may kuni o‘zgartirish va qo‘shimchalar kiritildi. Qarorga ko‘ra, propiska qilish tartibiga oid amaldagi nizom 2020-yil 1-sentabrga qadar amal qiladi. Hukumatning mazkur qarori bilan O‘zbekiston fuqarolarini Toshkent shahri va Toshkent viloyatida doimiy yashash va vaqtincha turgan joyi bo‘yicha ro‘yxatga olish tartibi to‘g‘risida nizom tasdiqlandi. Yangi nizom 2020-yil 1-sentabrdan kuchga kiradi.
Shuningdek, Prezident tomonidan 20-mayda imzolangan “‘Davlat boji to‘g‘risida’gi qonunga o‘zgartish va qo‘shimchalar kiritish haqida”gi qonunga muvofiq, O‘zbekistonda doimiy yashovchi va respublikaning boshqa mintaqalarida doimiy propiskaga ega bo‘lgan O‘zbekiston fuqarolari tomonidan Toshkent shahri va Toshkent viloyatida yangi qurilgan ko‘chmas mulk sotib olinganda mol-mulkning oldi-sotdi shartnomalarini tasdiqlaganlik uchun shartnoma summasining 5 foiz miqdordagi davlat bojining alohida stavkasi bekor qilindi.
Izoh (0)