Қашқадарёда 2020 йил якунига қадар 47 та кўп қаватли уй қурилади

Қашқадарёда 2020 йил якунига қадар 1140 хонадонли 47 та арзонлаштирилган кўп қаватли квартира қурилади. Бу ҳақда «Дарё»га «Қишлоққурилишинвест» МЧЖ инжиниринг компанияси Қашқадарё филиали директор ўринбосари Сардор Муродов хабар берди.

Таъкидланишича, мазкур кўп қаватли уйларнинг 45 таси туманларда барпо этилади.

«Шундан 843 та хонадон уй-жой шароитини яхшилашга муҳтож фуқароларга, 150 таси меҳнат мигрантларига, 35 таси алоҳида намуна кўрсатаётган ёш оилаларга, 52 таси эса оғир ижтимоий вазиятга тушиб қолган хотин-қизларга топширилади», — дейди филиал бош ҳисобчиси Жасур Раҳимов.

Сардор Муродовнинг қўшимча қилишича, мазкур арзон уйларга қўшимча тарзда Қарши шаҳри «Рогузар» маҳалласида Мудофаа вазирлигининг ҳарбий хизматчилари учун беш қаватли 30 хонадонли ва Ички ишлар бошқармаси ходимлари ҳамда Миллий гвардия ҳарбий хизматчилари учун яна битта беш қаватли 30 хонадонли уй-жой қурилиши режалаштирилган.

«2020 йил якунига қадар қуриб битказилиши мўлжалланган 47 та уйнинг ҳам бошланғич тўловлари амалга оширилган бўлиб, айни кунда қурилиш ишлари жадал суръатларда олиб борилмоқда», — дейди Жасур Раҳимов.

Маълумот берилишича, «Қишлоққурилишинвест» инжиниринг компаниясининг Қашқадарё вилоят филиали 2009—2016 йилларда вилоятда ер майдони олти сотих бўлган 7578 та уй қурган бўлса, 2017—2019 йилларда эса икки сотих ер майдонга эга 2971 та уй қурган. 2020 йилда эса бирорта ҳам намунали уй-жой қурмайди.