Qashqadaryoda 2020-yil yakuniga qadar 1140 xonadonli 47 ta arzonlashtirilgan ko‘p qavatli kvartira quriladi. Bu haqda “Daryo”ga “Qishloqqurilishinvest” MChJ injiniring kompaniyasi Qashqadaryo filiali direktor o‘rinbosari Sardor Murodov xabar berdi.
Ta’kidlanishicha, mazkur ko‘p qavatli uylarning 45 tasi tumanlarda barpo etiladi.
“Shundan 843 ta xonadon uy-joy sharoitini yaxshilashga muhtoj fuqarolarga, 150 tasi mehnat migrantlariga, 35 tasi alohida namuna ko‘rsatayotgan yosh oilalarga, 52 tasi esa og‘ir ijtimoiy vaziyatga tushib qolgan xotin-qizlarga topshiriladi”, — deydi filial bosh hisobchisi Jasur Rahimov.
Sardor Murodovning qo‘shimcha qilishicha, mazkur arzon uylarga qo‘shimcha tarzda Qarshi shahri “Roguzar” mahallasida Mudofaa vazirligining harbiy xizmatchilari uchun besh qavatli 30 xonadonli va Ichki ishlar boshqarmasi xodimlari hamda Milliy gvardiya harbiy xizmatchilari uchun yana bitta besh qavatli 30 xonadonli uy-joy qurilishi rejalashtirilgan.
“2020-yil yakuniga qadar qurib bitkazilishi mo‘ljallangan 47 ta uyning ham boshlang‘ich to‘lovlari amalga oshirilgan bo‘lib, ayni kunda qurilish ishlari jadal sur’atlarda olib borilmoqda”, — deydi Jasur Rahimov.
Ma’lumot berilishicha, “Qishloqqurilishinvest” injiniring kompaniyasining Qashqadaryo viloyat filiali 2009—2016-yillarda viloyatda yer-maydoni olti sotix bo‘lgan 7578 ta uy qurgan bo‘lsa, 2017—2019-yillarda esa ikki sotix yer-maydonga ega 2971 ta uy qurgan. 2020-yilda esa birorta ham namunali uy-joy qurmaydi.
Izoh (0)