Қашқадарё вилояти Косон туманида 28 май кунига ўтар кечаси икки гуруҳ йигитларнинг ўзаро келишмовчилиги пичоқбозлик билан тугади. Бу ҳақда Ички ишлар вазирлиги ҳузуридаги Тергов департаменти хабар берди.
Маълум қилинишича, 2020 йилнинг 28 май кунига ўтар кечаси соат 03:00 да 33 ёшли Р.Н. бошқарувида бўлган Nexia автомашинасида жияни, 22 ёшли У.Ш. ҳамда танишлари, 26 ёшли П.Ш., 25 ёшли Ш.Қ. ва 26 ёшли И.С.ни ўз уйларига ташлаб кетиш учун Қашқадарё вилояти Косон тумани Обод кўчасида автомашинани тўхтатган.
Nexia ҳайдовчиси Р.Н. танишлари билан хайрлашаётган вақтида уларнинг ортидан ўзларига олдиндан таниш бўлган 20 ёшли О.Д. «ВАЗ 2106» машинасида ўзининг танишлари 22 ёшли И.Х., 21 ёшли О.Р., 19 ёшли Б.Н. ва 22 ёшли Д.Ф. билан келиб тўхтаган. Икки гуруҳ бир-бирлари билан салом-алик қилаётган вақтида Ш.Қ. «ВАЗ 2106» ҳайдовчиси О.Д.нинг қўлини сиқиб кўришган ва ҳеч бир сабабсиз унинг биқин соҳасига бир мушт урган. Шундан сўнг О.Д. Ш.Қ.нинг юз қисмига бир мушт уриб, уни йиқитган.
Ушбу ҳолатдан сўнг йиқилган Ш.Қ.нинг таниши, маст ҳолатда бўлган И.С. О.Д.нинг маст ҳолатдаги таниши И.Х. билан ўзаро жанжаллашиб қолган. Натижада И.Х. ёнида бўлган ошхона пичоғи билан И.С.нинг чап елка орқа соҳасига бир марта санчиб олиб, тан жароҳати етказган. Оқибатда И.С. тан жароҳати билан туман шифохонасига ётқизилган.
Ҳолат юзасидан Косон тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 104-моддаси 1-қисми (Баданга қасддан оғир тан жароҳати етказиш) билан жиноят иши қўзғатилган. Ҳозирда ҳолат юз берган жойда бўлган барча шахслар билан тергов ҳаракатлари олиб борилмоқда.
Изоҳ (0)