Ўзбекистон Санитария-эпидемиология назорати давлат инспекцияси бош инспектори Нурмат Отабеков 3 июнь, чоршанба куни бўлиб ўтган брифингда карантинга олинган кўп қаватли уйларда неча марта дезинфекция ишлари амалга оширилиши ҳақида маълумот берди.
Унинг маълум қилишича, кўп қаватли уйларда зинапоя, тамбур, лифт, кириш жойи, чиқинди ташлаш жойларида жорий ва якуний дезинфекция ишлари амалга оширилади.
Жорий дезинфекция ишлари кўп қаватли уйда яшовчи аҳолини огоҳлантирган ҳолда кунига икки марта — эрталаб ва кечқурун ўтказилади.
Шунингдек, Нурмат Отабеков карантиндан чиққан фуқаро билан қўл бериб кўришиш масаласига ҳам тўхталди.
Унинг таъкидлашича, нафақат карантин зонадан келганлар билан, балки бошқа инсонлар билан ҳам қўл бериб, қучоқлашиб, бош уриштириб ва ўпишиб кўришиш мумкин эмас.
Аввалроқ Ўзбекистонда бир кунда 2600 дан ортиқ фуқаро карантинга олингани, Бухорода коронавирусга чалинган оила билан мулоқот қилган 268 фуқаро, коронавирусга чалинган 2 нафар андижонлик ҳайдовчи сабабли эса қарийб 100 киши карантинга олингани ҳақида хабарлар берилганди.
Изоҳ (0)