Андижон туманида икки нафар фуқаронинг 100 миллион сўмдан ортиқ маблағини ўзлаштирган Давлат солиқ инспекцияси бўлим бошлиғига нисбатан жиноят иши қўзғатилди. Бу ҳақда «Дарё»га Бош прокуратура ҳузуридаги Иқтисодий жиноятларга қарши курашиш департаменти матбуот хизмати хабар берди.
Маълум қилинишича, департаментнинг Андижон туман бўлими томонидан тадбиркорлар Ф.У. ва С.Т.нинг мурожаатига асосан, уларнинг қонуний ҳуқуқ ва манфаатларини ҳимоя қилиш борасида терговга қадар текширув ўтказилган. Текширувда Андижон туман Давлат солиқ инспекцияси таҳлил ва прогнозлаш бўлими бошлиғи Ж.Қ. томонидан қонунбузарлик ҳолатлари содир этилгани маълум бўлган.
Бўлим бошлиғи Ж.Қ. жисмоний шахслардан олинадиган даромад солиғи ҳисобрақамига тўланган декларация солиғидан мавжуд ортиқча тўловларни қайтариш юзасидан сохта хулосалар тузган. Шундан сўнг Ж.Қ. ушбу пул маблағлари ҳисобидан қариндоши У.Қ. ва туман Давлат солиқ инспекцияси ходими Р.О.нинг номига очилган пластик карталарга 236,2 миллион сўмни тушириб, шундан 129,5 миллион сўмини фуқароларга қайтарган. Қолган 106,7 миллион сўмини эса ўз эҳтиёжлари учун сарфлаб, ўзлаштириш йўли билан талон-торож қилган.
Мазкур ҳолат юзасидан Ж.Қ.га нисбатан Жиноят кодексининг тегишли моддаси билан жиноят иши қўзғатилиб, тергов ҳаракатлари ўтказилмоқда.
Изоҳ (0)