Коронавирус аломатларини 3 кун олдин аниқлайдиган «ақлли» узук яратилди

Oura компанияси Health узуги учун инсонда коронавируснинг ташқи аломатларини уч кун олдин аниқлашга қодир дастур яратди, деб хабар беради Engadget.

Дастур 90 фоиз аниқликда ишлайди. Узук эгаси ҳар куни эрталаб кичик сўровномада иштирок этади, олинган маълумотлар сунъий интеллект алгоритмлари ёрдамида қайта ишланади. Шунингдек, ақлли узук ўз эгасининг биологик кўрсаткичларини мониторинг қилади — тана ҳароратини ўлчайди, уйқу режимини, шунингдек, жисмоний фаоллик ва юрак ритми даражаларини кузатади.

«Холистик ва интеграциялашган нейробиологик платформа инсон организмини мунтазам кузатади, бу эса COVID-19’нинг белгилари пайдо бўлишини олдиндан аниқлаш имконини беради. Фикримизча, мазкур платформа тиббиёт ходимларимиз, тез ёрдам шифокорлари ва COVID-19 даврида яшаётган фуқароларнинг муҳим ҳимоя воситасига айланади», — дейди лойиҳа муаллифи Али Ризоий.

Айни вақтида мазкур тизим 600 дан ортиқ тиббиёт ходими иштирокида синовдан ўтказилмоқда.