Ўзбекистонинг Хитойдаги элчихонаси ташаббуси билан Ўзбекистон—Қирғизистон—Хитой темир йўл қурилиши лойиҳасини амалга ошириш бўйича келгусидаги амалий чора-тадбирлар муҳокамасига бағишланган навбатдаги видеоконференция ташкил этилди. Бу ҳақда «Дунё» ахборот агентлиги хабар бермоқда.
ХХР 1-лойиҳа-қидирув институти вице-президенти Чжу Личжен раислигида ўтган онлайн-мулоқотда пандемия шароитида давлат чегаралари орқали темир йўл транспортида юкларни ташиш тобора долзарб аҳамият касб этаётгани таъкидланди.
Учрашувда темир йўл ўтадиган довонларда тоннеллар ва кўприклар қуриш, улардан фойдаланишда ҳаракат хавфсизлигининг таъминланиши, электр линияларини улаш, қурилишга сармоя киритиш, темир йўлнинг аҳоли яшаш пунктларидан ўтадиган қисмлари барпо этилиши ва бошқа масалалар юзасидан фикр алмашилди.
Шу билан бирга, темир йўлни лойиҳалаш ва қурилиш ишларида қўлланилаётган техник стандартлар, уни молиялаштириш манбалари ва бошқа муҳим ташкилий масалалар борасида фикр алмашилди.
Томонлар кун тартибидаги масалалар бўйича билдирилган таклифларни атрофлича ўрганиш ва навбатдаги масалалар муҳокамасига бағишланган тадбирни изчил давом эттиришга келишиб олди, дейилади агентлик хабарида.
Мазкур лойиҳа 2020 йил 20 май куни Ўзбекистон транспорт вазири Элёр Ғаниев, Қирғизистон транспорт ва йўл вазири Жанат Бейшенов, Хитой Халқ Республикасининг ислоҳотлар ва ривожланиш бўйича давлат қўмитасининг чет эл капитали ва хорижий инвестициялар департаменти бош директори ўринбосари Чжэн Чипинг бошчилигида видеоконференцалоқа шаклида муҳокама қилинганди.
Изоҳ (0)