«Шуҳрат Ғаниев ва бошқа раҳбарлар етиб келиб, вазиятнинг чуқурлашишига йўл қўймаган» — Абдулла Арипов Сўхдаги можаро ҳақида
Фарғона вилояти Сўх туманига Сайидбаҳром Сайидмусаев янги ҳоким этиб тайинлангани ҳақида аввалроқ хабар берилганди. Туман ҳокимлиги томонидан маълум қилинишича, тайинлов масаласи кўриб чиқилган халқ депутатлари Сўх туман Кенгашининг навбатдан ташқари сессиясида Ўзбекистон бош вазири Абдулла Ариповнинг шахсан ўзи иштирок этган.
Шунингдек, сессияда халқ депутатлари туман Кенгаши депутатлари, Сўх тумани ҳокимининг ўринбосарлари, тумандаги давлат ва жамоат ташкилотлари раҳбарлари, Фарғона вилояти ҳокимининг ўринбосарлари, вилоят бошқарма ва ташкилотлар раҳбарлари, вилоят ҳуқуқ-тартибот идоралари раҳбарлари, шунингдек, Ўзбекистон Президенти Администрацияси масъуллари, бош вазир ўринбосарлари, республика вазирлик ва идора раҳбарлари ҳамда оммавий ахборот воситалари вакиллари иштирок этган.
Бош вазири Абдулла Арипов сўнгги кунларда Сўхда бўлиб ўтган воқеалар ва сессияда кўрилган масала бўйича ўз фикрларини билдирди.
«Авваламбор, сиз ҳурматли Сўх тумани фаолларига, сизларнинг тимсолингизда бутун Сўх аҳлига муҳтарам Президентимиз, ҳурматли Шавкат Миромонович Мирзиёевнинг чуқур ҳурмат ва эҳтиромларини етказаман. Албатта, бир неча кун олдин чегара ҳудудидаги бўлган нохуш ҳолат кўп нарсаларни қайтадан кўриб, қайтадан қарашга ҳаммамизни мажбур қилди. Бевосита Президентимизнинг топшириқлари билан мен бошчилигимда вазиятни ўрганиш учун мутасадди идоралар раҳбарлари етиб келди. Биринчи навбатда вилоят раҳбари Шуҳрат Ғаниев ва бошқа раҳбарлар етиб келиб, вазиятнинг чуқурлашишига йўл қўймаган. Тинчликнинг қадрига етиш — бу жуда катта бахт. Муҳтарам Президентимизнинг чегарадош ҳудудлар билан олиб бораётган яхши қўшничилик сиёсатини бутун жаҳон эътироф этиб турибди. Бизнинг олдимизда энг катта масъулият турибди — бу Сўх туманидаги муаммоларни ҳал этиш ва бевосита Президентимизнинг эътибори асосида туманни обод қилиш. Бунинг учун давлатимиз томонидан барча имкониятлар ва шароитлар яратиб берилади. Сўх туманини ижтимоий-иқтисодий ривожлантириш бўйича давлат раҳбарининг қарорлари ҳам чиққан ва шу асосда туманда тизимли ишлар олиб борилиши лозим. Бу ишларда сайланадиган янги туман ҳокимидан катта масъулият талаб этилади», — деди Абдулла Арипов.
Шунингдек, сессия давомида туман ҳокимининг ўринбосарлари ҳам тайинланди.
Эслатиб ўтамиз, Ўзбекистон—Қирғизистон чегарасида жойлашган Чашма булоғи олдида 31 май куни икки мамлакат фуқаролари ўртасида зиддият келиб чиққан. Ўзбекистон бош вазири Абдулла Арипов 1 июнь куни воқеа юз берган жойга ташриф буюрди ва аҳоли билан учрашди. Шунингдек, Абдулла Арипов Қирғизистон расмийлари билан учрашиб, ҳодиса юзасидан музокара олиб борди. Шу куни Ўзбекистон ва Қирғизистон президентлари мазкур ҳодисани телефон орқали муҳокама қилди. Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрди.
Можаро оқибатида 187 нафар ўзбекистонлик касалхонага ётқизилган, Ўзбекистон томонда учта хонадон ёниб кетган. Қирғизистоннинг Боткен вилоятида эса уй ва омборхона ёниб кетган, шунингдек, 25 киши жароҳат олган.
Бундан ташқари, бош вазир Абдулла Арипов билан бўлиб ўтган учрашувда сўхликлар вилоят ҳокими Шуҳрат Ғаниевдан норози эканлигини ҳам билдирган.
