Президент 2 июнь, сешанба куни «Ўзбекистон Республикасининг халқаро рейтинг ва индекслардаги ўрнини яхшилаш ҳамда давлат органлари ва ташкилотларида улар билан тизимли ишлашнинг янги механизмини жорий қилиш тўғрисида»ги фармонни имзолади. Бу ҳақда Адлия вазирлиги матбуот хизмати хабар берди.
Фармонга кўра, халқаро рейтинг ва индекслар билан ишлаш бўйича республика кенгаши ташкил этилди ва унинг асосий вазифалари белгиланди.
Кенгаш вазифаларидан бири Ўзбекистоннинг ижтимоий-иқтисодий ва сиёсий-ҳуқуқий тараққиёт даражасини тизимли таҳлил қилиб бориш, амалга оширилаётган туб ўзгаришларнинг халқаро рейтинг ва индексларда мамлакатнинг ўрнини яхшилаш мақсадларига хизмат қилишини таъминлашдир.
Молия вазирлиги ва Адлия вазирлиги кенгашнинг ишчи органлари этиб белгиланди. Шунга кўра, ижтимоий-иқтисодий ва сиёсий-ҳуқуқий рейтинг ва индексларнинг кенгаш ишчи органлари бўйича тақсимоти тасдиқланди.
Фармон билан, шунингдек, Ўзбекистон учун устувор бўлган халқаро рейтинг ва индекслар бўйича самарадорликнинг энг муҳим кўрсаткичлари (KPI) тасдиқланди.
Фармонга кўра, масъул давлат органларининг биринчи раҳбарлари ҳар чорак якуни бўйича:
- кейинги ойнинг 15-санасига қадар Кенгаш ишчи органларига мамлакатда амалга оширилаётган ислоҳотлар тўғрисидаги маълумотлар, зарур статистик ахборотлар ва бошқа материалларни тақдим этади;
- кейинги ойнинг 30-санасига қадар Кенгаш раиси ёки ўринбосарининг раҳбарлигида ўтказиладиган йиғилишларда тегишли халқаро рейтинг ва индексларда KPI’га эришиш учун амалга оширилган чора-тадбирлар тўғрисида ахборот берилади.
2020 йил 1 октябрга қадар «Ўзбекистон Республикаси халқаро рейтингларда» ягона портали ишга туширилади.
Изоҳ (0)