Ўзбекистон фуқароларини хориждан олиб келиш мақсадида тасдиқланган чартер рейслар жадвалига мувофиқ, 1—2 июнь кунлари Тошкент—Истанбул—Тошкент, Тошкент—Москва—Тошкент йўналишларида амалга оширилган парвозлар орқали 677 нафар фуқаро Ўзбекистонга олиб келинди. Бу ҳақда Транспорт вазирлиги хабар берди.
Маълум қилинишича, 3 июнь куни Тошкент—Шаржа—Тошкент ҳамда Тошкент—Москва—Тошкент йўналишларида чартер рейслар амалга оширилиши белгиланган.
Бундан ташқари, 4 июнь куни Тошкент—Санкт-Петербург—Тошкент йўналишида чартер рейс амалга оширилади.
Аввал тасдиқланган чартер рейслар жадвалига мувофиқ, 25—31 май кунлари 8 та қатнов амалга оширилган ҳамда Россия ва Туркиядан жами 2118 нафар фуқаро Ўзбекистонга олиб келиниши хабар қилинганди. 13 майдан 24 майгача хориждаги ўзбекистонликларни олиб келиш учун 12 та рейс амалга ошириш белгиланган ва режага асосан амалга оширилганди.Шавкат Мирзиёев раислигида 26 май куни бўлиб ўтган йиғилишда чет элдан олиб келинган Ўзбекистон фуқаролари сони 47 минг нафарни ташкил этаётгани маълум қилинганди. Кейинги 10 кунда эса 3,5 минг одам ҳаво йўллари, 7 мингга яқин ватандош эса чегара постлари орқали Ўзбекистонга келиши кутилаётгани билдирилганди. Шунингдек, 100 мингдан ортиқ фуқаро Ўзбекистонга қайтиш истагини билдириб, навбат кутаётгани айтилганди.
Изоҳ (0)