Ўзбекистон бош вазири ўринбосарлари ва вазирлар қирғизистонликлар билан можаро юз берган «Чашма» маҳалласига ташриф буюрди (фото)

Ўзбекистон бош вазири ўринбосарлари ва бир қатор вазирлар қирғизистонликлар билан сув устидан можаро юз берган Фарғона вилояти Сўх туманидаги «Чашма» маҳалласига етиб борди. Бу ҳақда Сўх тумани ҳокимлиги маълум қилди.

Маълум қилинишича, бош вазир Абдулла Арипов 1 июнь куни «Чашма» маҳалласида Сўх тумани аҳолиси билан бўлган учрашувда унинг барча ўринбосарлари, турли соҳалар вазирлари келиб, туманни иқтисодий-ижтимоий ривожлантириш бўйича дастур тайёрлашини ваъда қилган. Ҳукумат аъзолари ва бир гуруҳ вазирлар 2 июнь куни вертолётда туманга етиб келган. Улар дастлаб Чашма булоғига ташриф буюрган.

Қайд этилишича, мазкур делегация аъзолари давлат раҳбарининг топшириғи билан анклав ҳудуддаги муаммоларни ўрганиб, дастур тайёрлаш ва бу орқали мавжуд муаммоларни бартараф этиш учун ташриф буюрган.

Эслатиб ўтамиз, Ўзбекистон—Қирғизистон чегарасида жойлашган Чашма булоғи олдида 31 май куни икки мамлакат фуқаролари ўртасида зиддият келиб чиққан. Ўзбекистон бош вазири Абдулла Арипов 1 июнь куни воқеа юз берган жойга ташриф буюрди ва аҳоли билан учрашди. Шунингдек, Абдулла Арипов Қирғизистон расмийлари билан учрашиб, ҳодиса юзасидан музокара олиб борди. Шу куни, Ўзбекистон ва Қирғизистон президентлари мазкур ҳодисани телефон орқали муҳокама қилди.

Можаро оқибатида 187 нафар ўзбекистонлик касалхонага ётқизилган, Ўзбекистон томонда учта хонадон ёниб кетган. Қирғизистоннинг Боткен вилоятида эса уй ва омборхона ёниб кетган, шунингдек, 25 киши жароҳат олган.