Ўзбекистонда никоҳланувчи ёшларни оилавий ҳаётга тайёрлаш мақсадида Ёшларни оилавий ҳаётга тайёрлаш марказларини ташкил этиш режалаштирилмоқда. Бу ҳақдаги Вазирлар Маҳкамаси қарори жамоатчилик муҳокамаси учун эълон қилинди.
Қарорга кўра, Ёшларни оилавий ҳаётга тайёрлаш марказлари юридик шахс мақомига эга бўлмаган ҳолда туман (шаҳар) маҳалла ва оилани қўллаб-қувватлаш бўлимлари тузилмасида ташкил этилади.
Маҳалла ва оилани қўллаб-қувватлаш вазирлиги томонидан таклиф қилинган «Оила институтини янада ривожлантириш ва ёшларни оилавий ҳаётга тайёрлаш чора-тадбирлари тўғрисида»ги ҳукумат қарори лойиҳасида янги марказнинг вазифалари кўрсатиб ўтилган.
Унга кўра, Ёшларни оилавий ҳаётга тайёрлаш марказлари замонавий оиланинг намунали шаклини ҳамда «Оила — муқаддас», «Соғлом оила — соғлом жамият», «Оила жамият ва давлат ҳимоясида» ва «Фаровон оила — жамият равнақининг асоси» концептуал ғояларини никоҳланувчиларнинг онгига сингдириб бориши керак бўлади.
Шунингдек, марказлар томонидан никоҳланувчи шахсларни оилавий-ҳуқуқий муносабатлар, оилавий ҳаёт психологияси, оила иқтисоди ва бюджети, репродуктив саломатлик асослари, маънавий-ахлоқий қадриятларни мустаҳкамлаш масалалари бўйича тизимли тайёрлашни йўлга қўйиш режалаштирилмоқда. Никоҳланувчи шахсларда оилавий қадриятларни сақлаш, оилаларда соғлом маънавий-ахлоқий муҳитни яратиш ҳамда ибратли ота-она бўлиш кўникмаларини шакллантиришда кўмаклашиш ҳам марказлар вазифалари қаторидан жой олади.
Мазкур марказларда машғулотлар, назарий-амалий курслар, маҳорат сабоқлари, давра суҳбатлари, семинар-тренингларни илғор ижобий хорижий тажрибаларни инобатга олиб, ўқув жараёнига энг сўнгги илмий-услубий технологиялар ва реклама-ахборот усулларини жорий этган ҳолда ташкил этиш кўзланмоқда.
Мазкур қарор билан Ёшларни оилавий ҳаётга тайёрлаш марказлари тўғрисидаги низомни тасдиқлаш ҳам назарда тутилган.
Марказлар фаолиятини «Маҳалла» хайрия жамоат фондига ҳар йили ўтказиладиган умумхалқ хайрия ҳашаридан тушадиган тушумлар, Ёшлар иттифоқи маблағлари, туман (шаҳар) маҳаллий бюджетларининг қўшимча манбалари, юридик ва жисмоний шахсларнинг ҳомийлар хайриялари, халқаро ташкилотлар грантлари, қонун ҳужжатлари билан тақиқланмаган бошқа манбалар ҳисобидан молиялаштириш режалаштирилмоқда.
Марказларга яқиндан ёрдам бериш ва фаолиятини самарали ташкиллаштириш масалалари туман даражасида туман (шаҳар) маҳалла ва оилани қўллаб-қувватлаш бўлими бошлиғининг биринчи ўринбосари, вилоят даражасида маҳалла ва оилани қўллаб-қувватлаш бошқармаси бошлиғининг биринчи ўринбосари, оилавий қадриятларни мустаҳкамлаш бўйича бош мутахассис, республика даражасида Маҳалла ва оилани қўллаб-қувватлаш вазирининг биринчи ўринбосари, оилавий қадриятларни мустаҳкамлаш бошқармаси бошлиғи зиммасига юкланади.
Шунингдек, қарорга мувофиқ оила институтини илмий-амалий тадқиқотлар асосида тизимли ривожлантириш мақсадида Маҳалла ва оилани қўллаб-қувватлаш вазирлиги ҳузурида Оила институтини ривожлантириш илмий-амалий маслаҳат кенгаши тузиш режалаштирилган.
Эслатиб ўтамиз, Ёшларни оилавий ҳаётга тайёрлаш марказларини ташкил этиш тўғрисидаги ҳукумат қарори лойиҳаси 2019 йилнинг ноябрь ойида ҳам муҳокама учун эълон қилинганди.
Изоҳ (0)