Сўнгги 1 йил ичида энг кўп даромад топган боксчи ва MMA жангчиси маълум бўлди

Бокс бўйича оғир вазн тоифасида WBC чемпионлик камари соҳиби Тайсон Фьюри сўнгги бир йилликдан боксчилар орасида энг кўп даромад топди.

Forbes нашри 2019 йил 1 июнидан 2020 йил 1 июнига қадар бўлган муддатда энг кўп даромад қилган спортчилар рейтингини эълон қилди. Бу вақт ичида 57 миллион доллар ишлаб топган Фьюри рўйхатнинг 11-поғонасидан жой олди. Унинг 50 миллиони гонорар бўлса, 7 миллиони рекламадан тушган маблағ ҳисобланади.

MMA жангчилар орасида энг кўп пул топган спортчи Конор Макгрегор бўлди. У 48 миллион доллар даромад билан умумий рейтингнинг 16-поғонасига жойлашди. Ирландиялик яккакурашчи кучли юзликдан ўрин олган ягона MMA вакили бўлди.

Бокс бўйича оғир вазнда WBA, WBO, IBF ва IBO камарлари соҳиби Энтони Жошуа (47 миллион доллар) 19-ўринда қайд этилди. Яна бир оғир вазн вакили Деонтей Уайлдер (46 млн) 20-ўринни банд этди. Шунингдек, ўрта вазн тоифасида WBA чемпиони Сауль «Канело» Альварес (37 млн) 30-ўринни эгаллади.