Ўзбекистонда коронавирусга қарши кураш учун жалб қилинган тиббиёт ходимларига тўланадиган 19,6 миллиард сўм миқдоридаги рағбатлантирувчи тўловлар ўз вақтида тўланмагани ҳақида хабар берилган эди. Хусусан, Самарқанд вилоятида 61 нафар тиббиёт ходимига 1,2 миллиард сўм рағбатлантириш пулларининг тўланишида кечикиш ҳолатлари юзага келган.
Самарқанд вилоят соғлиқни сақлаш бошқармаси ахборот хизмати томонидан маълум қилинишича, рағбатлантириш пулларининг тўланишида кечикиш ҳолатларининг юзага келишига сабаб бўлган ходим ўз лавозимидан озод этилган.
Хабар берилишича, 2020 йилнинг 1 май куни вилоятда коронавирус инфекцияси тарқалишининг олдини олиш мақсадида тизимда иш унумдорлигини янада ошириш ҳамда ходимлар томонидан ички меҳнат тартиб қоидаларига тўлиқ риоя этиш масаласига қаратилган навбатдаги ижро аппарати йиғилиши ўтказилган.
Йиғилиш баёнига кўра, инқирозга қарши ташкил этилган жамғармадан берилаётган 6 фоизлик қўшимча маблағ ҳамда карантинга бириктирилган ходимларнинг иш ҳақлари, штатларнинг тўғри тақсимланиши, шунингдек, уларнинг ҳисоб-китобини юритиш ишлари бошқарманинг бош иқтисодчиси С.Исломов зиммасига юклатилган.
Маълум қилинишича, С.Исломов тиббиёт ходимларига маблағ ажратиш учун молия бош бошқармасига тақдим этиладиган талабномани ўрнатилган тартибда, ўз вақтида тақдим этмаганлиги сабабли ўз вазифасидан озод этилган.
Эслатиб ўтамиз, Молия вазирлиги Давлат молиявий назорати департаменти томонидан 2020 йилнинг 15—18 май кунлари ўтказилган тадбирлар давомида мамлакат бўйича 32 та тиббиёт муассасасида 932 нафар ходимга 19,6 миллиард сўм миқдоридаги махсус рағбатлантириш пуллари тўлови кечиктирилганлиги аниқланган.
Эслатиб ўтамиз, Ўзбекистонда коронавирус инфекциясидан зарарланган беморлар билан мулоқотга киришадиган, зарарланган беморлар жойлаштирилган объектларда ҳамда коронавирус инфекциясини аниқлаш лабораторияларида фаолият олиб бораётган тиббиёт ходимларига ҳар 14 кунлик фаолият даври учун махсус қўшимча рағбатлантириш тўлови белгиланган. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.
Коронавирус инфекциясига қарши курашиш доирасида беморлар билан ишлаган вақтида коронавирус инфекциясини юқтириш натижасида оғир аҳволга тушган ва соғлиғи тикланмаган тақдирда тиббиёт, санитария-эпидемиология хизмати ва бошқа ходимларга ёки уларнинг оила аъзоларига эса 250 миллион сўм миқдорида бир марталик тўловлар тўланади.
Изоҳ (0)