Қарши туман ҳокими Мақсуда Мустафоева: «Ариповдек қуюшқондан чиқади деб ўйласангиз, менда бундай бўлмайди»
Қашқадарёда кластер ва туман ҳокимлиги ўртасида бўлиб ўтаётган суд жараёнида сўз олган Қарши тумани ҳокими Мақсуда Мустафоева кластер раҳбари Нурбек Эргашевнинг саволига жавоб бераркан, «Ариповдек қуюшқондан чиқади деб ўйласангиз, менда бундай бўлмайди», деди. Мустафоева бу гапи билан ўринбосари Акром Ариповни ўтган суд мажлисида қуюшқондан чиққанлигини таъкидлади.
Судда даъвогар сифатида иштирок этган Sulton Тех Group корхонаси раҳбари Нурбек Эргашев ҳокимга «Кооперация деганда нимани тушунасиз? Кластер фаолияти тугатилмасдан туманда ташкил этилган кооперация қонун талабларига мос тузилдими?», дея савол берди.
Ҳоким эса тумандаги кооперация қонуний асосда тузилганини таъкидлаб, фермерларнинг ихтиёрий бирлашуви кооперация бўлишини айтди.
Мавзуга доир:
Судда қатнашган Бизнес-омбудсман вакили Шероз Шодиев туман ҳокимидан кластер тумандаги банкларда ҳисоб рақам очмаганини танқид қилганини эслатиб, бу тадбиркор ишига аралашиш эканлигини ва ҳокимдан бундай ҳаракатининг сабабини сўради.
Қарши туман ҳокими эса тадбиркорнинг Қарши шаҳридаги банкларда ҳисоб рақам очганига қаршимаслигини, бу борада кластерга эътироз билдирмаганини таъкидлади.
Кези келганда айтиш лозимки, Қарши тумани ҳокими «Дарё» мухбири билан шу масала юзасидан суҳбатида кластер тумандаги банкларда ҳисоб рақам очмаганини айтиб, бунга эътироз билдирганди.
Судда сўз олган Sulton Тех Group вакили Эшқобил Пардаев туман ҳокимига бош вазир ўринбосари Ўктам Барноевга ёзган хатида кластер раҳбарига ҳисоб рақамини тумандаги банкларга кўчириб келиш бўйича бир неча марта огоҳлантириш берганини ёзиб, Барноев ва вилоят ҳокими Зоир Мирзаевдан тадбиркорнинг ўзбошимчалигини инобатга олиб, унга кўрсатма беришини сўраганини айтди ва ҳокимдан ушбу хатга изоҳ сўради.
Ҳоким мазкур ҳолатни изоҳлар экан, хатда «огоҳлантирилган» деб ёзган бўлса-да, тадбиркорни бу борада бирор марта ҳам огоҳлантирмаганини айтди. «Ўктам Барноевга юборилган хатдаги огоҳлантириш сўзи эса хато кетган бўлиши мумкин», деди.
Эслатиб ўтамиз, мазкур суд жараёни 5 июнга қадар танаффус эълон қилганди.
Мавзуга доир:
