Жиззах вилояти Дўстлик туманидаги фермер хўжаликлари маблағларини растрата қилган банк мансабдорларига нисбатан жиноят иши қўзғатилди. Бу ҳақда Бош прокуратура «Дарё»га маълум қилди.
Бош прокуратура ҳузуридаги Департаментнинг Дўстлик туман бўлими томонидан ўтказилган терговга қадар текширувда АТБ «Агробанк» Дўстлик филиали мансабдор шахслари фермер хўжаликлари маблағларини талон-торож қилгани аниқланди.
Улар «А-ф.» ва «Н-м.» фермер хўжаликлари раҳбарларини хабардор қилмаган ҳолда ҳисоб рақамларидаги жами 105,2 миллион сўм пул маблағларини тўлов топшириқномаларисиз «кўрсатилган техника хизматлари учун» ҳамда «қопланмаган кредит маблағларини қоплаш учун» мазмунида бошқа фермер хўжаликларининг ҳисоб рақамларига ўтказиб, пул маблағларини ўзлаштирган.
Мазкур ҳолат юзасидан АТБ «Агробанк» Дўстлик филиали мансабдор шахсларига нисбатан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Изоҳ (0)