Охирги 10 кун давомида Хитойнинг Хубэй провинциясидаги Ухань шаҳри аҳолисини оммавий скрининг қилиш натижасида COVID-19 коронавирус инфекциясининг 189 та симптомсиз ташувчилари аниқланди. Бу ҳақда шаҳар Соғлиқни сақлаш қўмитаси маълумотига таяниб, «РИА Новости» хабар қилган.
Ухань шаҳрининг тезкор штаби аҳоли 10 кун давомида оммавий скрининг қилингани ва бунинг натижасида янги касалланиш ҳолатлари аниқланганини маълум қилган. Оммавий тарзда тест қилиш 14 май куни бошланганди.
Интернетда тарқалган касалланиш графигига кўра 14 майдан 23 майгача 10 миллион аҳоли яшайдиган шаҳарда жами 6 574 093 та COVID-19 тести амалга оширилган. Ушбу давр оралиғида тиббиёт ходимлари 189 та симптомсиз вирус ташувчиларни аниқлаган.
Sinxua агентлигининг маълум қилишича, оммавий скрининг бошланишидан аввал шаҳарда 3 миллионта тест олинган.
Оммавий тест қилиш бепул ва ихтиёрий ҳисобланади. Дастлаб кекса ёшли кишилар истиқомат қиладиган, аввал касаллик ўчоқлари бўлган ҳудудлар тест қилинган, шунингдек, аввал текширилмаган аҳоли вакилларидан ҳам таҳлиллар олинган.
Оммавий тест қилиш 10 кун давом этиши лозимлигига қарамай, шаҳар маъмурияти турли сабабларга кўра таҳлилларини бера олмаган фуқароларнинг 26 майга қадар уларни топширишига рухсат берган.
Мавзуга доир: Уханлик олимлар ҳозиргача аниқланган вирусларни айсбергнинг чўққиси деб атади, улар вирусларни ўрганишни давом эттирмоқчи
Ухань 18 апрелда хавф даражаси паст бўлган ҳудуд деб топилганди, 26 апрелда шаҳардаги касалхонадан коронавирус инфекциясига чалинган охирги бемор даволаниб чиққанди.
Хитой ҳукумати 8 апрелдан транспорт чекловини бекор қилган ва одамларнинг Ухандан бошқа ҳудудларга боришига рухсат берганди. Шаҳар 76 кун давомида ташқи дунёдан бевосита узилиб қолган. Эпидемия даври давомида Уханда 50 340 та касалланиш ҳолати кузатилган, 3869 киши инфекция асоратлари оқибатида вафот этган.
Изоҳ (0)