Вьетнамда коронавирус пандемияси сабаб тўхтаб қолган футбол мавсуми қайта бошланди.
Танаффусдан кейинги илк ўйин «Нам Дин» ва «Хоанган Зялай» жамоалари ўртасида кечди. Жамоалар мамлакат Кубоги 1/16 финали доирасида ўзаро баҳс юритди. Унда мезбонлар 2:0 ҳисобидаги ғалабани қўлга киритди.
Эътиборлиси, Вьетнам мавсумни тўлақонли қайта бошлади, яъни, ўйинларга томошабинлар ташрифи чекланмади. Бутун дунёда коронавирусдан кейин қайта тикланган барча футбол лигалари томошабинларсиз ўтмоқда.
Мамлакат миллий биринчилиги март ойида 2-турдан сўнг тўхтаб қолганди.
Европанинг етакчи чемпионатларидан ҳозирча фақат Германия Бундеслигаси старт олди. Ла Лига баҳслари ҳам июнь ойининг биринчи ярмида бошланиши кутилмоқда. Март ойида тўхтаб қолган Ўзбекистон чемпионати тақдири эса ҳамон номаълум бўлиб қолмоқда.
Вьетнамда коронавирусга чалинганлар сони 326 тани ташкил этади. Уларнинг 272 нафари соғайган, ўлим ҳолати қайд этилмаган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)