Икки хил вазн тоифасида UFC собиқ чемпиони Конор Макгрегор тарихдаги энг яхши яккакурашчилар рейтингини тузиб чиқди.
Унда ирландиялик жангчи ўзини иккинчи ўринга лойиқ кўрган, рўйхатда енгил вазн тоифаси амалдаги чемпиони Ҳабиб Нурмагомедовга жой топилмаган.
«Икки вазн тоифасидаги кўплаб муддатидан аввал қўлга киритилган ғалабалар, чемпионлик унвони — Андерсон Сильва тарихдаги энг яхши яккакурашчилар рўйхатида биринчи ўринни эгаллайди. Учта дивизиондаги ғалабалар, иккита дивизиондаги чемпионлик мени тарихдаги иккинчи энг яхши жангчига айлантиради. Балки мен Сильва билан бир хил савиядадирман. Нима бўлмасин, фаолиятимни давом эттиряпман ва осонликча биринчи ўринга кўтарилишим мумкин.
Жорж Сен-Пьер — учинчи ўринда. Муддатидан аввал қўлга киритилган ғалабалари кам, бироқ у икки вазн тоифаси чемпиони. У анча орқада. Оғир жанглар ва баҳсли қарор туфайли ярим оғир вазн тоифасидан кетганди. Бир кўзли рақибга қарши октагонга чиққан. Қийинчиликлардан қочган.
Жон Жонс — тўртинчи поғона. Кўплаб нокаутлар ва у ҳали ҳам фаолиятида давом этмоқда. Бироқ битта вазн тоифаси чемпиони. Бундан ташқари тушуниб бўлмас ва баҳсли қарорлар эвазига ғалаба қозонган жанглари бор.
Допинг можароларини ҳисобга олмадим, акс ҳолда бу менга шубҳасиз биринчи ўринни тақдим этарди.
Нима бўлмасин Сильванинг биринчи ўриндалиги аниқ. У турли хил якунлар эвазига муддатидан аввал ғалабага эришган. Фронт-кик, тирсаклар, ёриқлар билан тугаган тизза зарбалари ва чағга берилган аниқ зарба ортидан қўлга киритилган ғалабалар. Менинг ва Сильванинг ғалабалари тарихдаги энг томошабоб ҳисобланади. Мен эндига қизиб оляпман», — дея ёзади Макгрегор.
Макгрегор сўнгги жангини январь ойида ўтказганди. UFC 246 мусобақасида Конор Дональд Серронени 40 сония ичида нокаутга учратган.
Изоҳ (0)