АҚШ президенти Дональд Трамп 2020 йилнинг биринчи чораги учун олиши керак бўлган маошини коронавирус эпидемиясига қарши курашга хайрия қилди. Бу ҳақда CBS телеканали мухбири Марк Ноллер ўзининг Twitter’даги саҳифасига ёзиб қолдирди.
Унинг сўзларига кўра, Оқ уйда бўлиб ўтган брифинг вақтида Америка президентининг матбуот котиби Кейли Макэнани Трамп томонидан имзоланган 100 минг долларлик чекни кўрсатган. Пуллар COVID-19’га қарши дориларни яратиш ва коронавирусга чалинган беморларни даволашга йўналтирилади.
Кейинроқ Трамп ўзининг Twitter’даги саҳифаси орқали йиллик маошининг барчасини коронавирус эпидемиясига қарши кураш йўлида хайрия қилиш ниятида эканлигини маълум қилган. Унинг сўзларига кўра, бу 400-450 минг доллар бўлади. Президентнинг таъкидлашича, мамлакатнинг Соғлиқни сақлаш ва ижтимоий хизмат вазирлигига ёрдам бериш — унинг учун шараф.
Март ойида Макэнани Трамп 2019 йилнинг тўртинчи чораги учун олган маошини хайрия сифатида бюджетга қайтарганини маълум қилганди.
Сўнгги маълумотларга кўра, АҚШда коронавирус билан касалланганлар сони 1,6 миллион кишидан ошган, вирус қурбонлари сони эса қарийб 98 минг кишига яқинлашди.
Эслатиб ўтамиз, 2015 йилги президентлик сайловларида Дональд Трамп АҚШ президенти бўлган тақдирда маошдан воз кечишга ваъда берганди.
Изоҳ (0)